ӨЧИГДӨР БОЛСОН ОНЦЛОХ ҮЙЛ ЯВДЛЫГ ТОЙМЛОН ХҮРГЭЖ БАЙНА:

• Улсын Их Хурлын даргаар Миеэгомбын Энхболдыг сонгож, өчигдөр Улсын Их Хурлын тамгыг гардуулж өгөв. Дараа нь шинээр сонгогдсон Улсын Их Хурлын дарга М.Энхболд үг хэллээ. Тэрбээр хэлсэн үгэндээ, өнөөдөр Улсын Их Хурлын 76 гишүүний бүрэн эрхийг хүлээн зөвшөөрч, гишүүд тангаргаа өргөснөөр төрийн эрх барих дээд байгууллага Улсын Их Хурал бүрэн эрхээ хэрэгжүүлэх бүтэн бүрэлдэхүүнтэй боллоо. Улсын Их Хурлын даргын өндөр хүндтэй албан тушаалд нэрийг минь дэвшүүлсэн МАН, сонгож батламжилсан Улсын Их Хурлын эрхэм гишүүддээ талархал илэрхийлье гэлээ.

• УИХ-ын анхдугаар чуулган өчигдөр нээлтээ хийж, гишүүд тангаргаа өргөсөн билээ. Анхдугаар чуулганы дараа АН-ын дарга З.Энхболд УИХ-д сонгогдсон намынхаа гишүүдэд баяр хүргэж, бүлгийн хуралдаанаа хийсэн байна. Хуралдаанаар С.Эрдэнэ гишүүнийг УИХ дахь АН-ын бүлгийн даргаар сонгосон байна. УИХ дахь АН-ын бүлэг нь есөн гишүүний бүрэлдэхүүнтэйгээр парламентад ажиллах юм.

• НИТХ-ын анхдугаар хуралдааныг өнөөдөр 11.00 цагт эхлүүлэх тогтоолыг НИТХ-ын тэргүүлэгчид баталсан. Нийслэлийн Иргэдийн Төлөөлөгчдийн долоо дахь удаагийн хурлын анхдугаар хуралдаанаар нийслэлийн ИТХ-ын сонгууль явуулсан дүн, шинээр сонгогдсон төлөөлөгчдийн бүрэн эрхийг зөвшөөрөх тухай, нийслэлийн ИТХ-ын даргыг сонгох, нийслэлийн ИТХ-ын Тэргүүлэгчдийн тоог тогтоож, Тэргүүлэгчдийг сонгох, нийслэлийн Засаг дарга бөгөөд Улаанбаатар хотын Захирагчид нэр дэвшүүлэх тухай асуудлыг хэлэлцэнэ. МАН-ын удирдах зөвлөл хуралдаж, хотын даргын албан тушаалд Су.Батболдыг, НИТХ-ын даргад нийслэлийн МАН-ын дарга Ц.Сандуй нарыг дэвшүүлсэн билээ.

• Наадмын өмнөх өдрүүд болох 7 дугаар сарын 6,7, 8, 9-нд нийт нутгаар халах төлөвтэй байна. Ялангуяа энэ сарын 8, 9-ний өдрүүдэд төв болон зүүн аймгуудын нутгаар 33-38 хэм хүрч хална гэсэн урьдчилсан төлөв гарчээ. Харин наадмын өдрүүдээр хур бороотой байна. Ялангуяа энэ сарын 8, 9-ний өдрүүдэд хэт халалттай байх юм байна.

• Монгол банкны захиалгаар Үл хөдлөх хөрөнгийн Тэнхлэг зууч компанийн хараат бусаар хийсэн “Орон сууцны үнийн индекс”-ийн (ОСҮИ) судалгааны 2016 оны 06-р сарын үр дүнг олон нийтэд танилцуулсан байна. Тус судалгаагаар өнгөрсөн 6-р сард Орон сууцны үнийн ерөнхий индекс 2.3 хувьтай гарлаа. Энэ нь өмнөх сараас 1.1 хувиар буурсан үр дүнг харуулж байна. Харин өнгөрсөн оны мөн үетэй харьцуулахад 10.3 хувиар буурчээ

• Дөрвөн настай охиноо зодож, үхэлд хүргэсэн хэрэгт буруутгагдаж буй Т.Цогт, Г.Маралмаа нарыг шүүх хурал өчигдөр Баянзүрх дүүргийн Эрүүгийн хэргийн анхан шатны шүүхэд болох байсан ч хойшилжээ. Энэ сарын 27-ныг хүртэл хойшилсон байна. Учир нь Г.Маралмаа өмгөөлөгчөөсөө татгалзжээ.

• Шударга өрсөлдөөн хэрэглэгчийн төлөө газраас /ШӨХТГ/ өчигдөр хяналт шалгалттай холбоотой мэдээлэл хийлээ. Энэ үеэр “Зорчигч тээврийн нэгтгэл” ОНӨААТҮГ-ынхан шатахуун худалдаж авахдаа Худалдан авах ажиллагааны болон тендерийн үйл ажиллагааг зөрчсөн гэж мэдээлэв. Өөрөөр хэлбэл, бөөний үнээр “М ойл”, “Сод Монгол” компаниас шатахуун авахдаа өндөр үнээр гэрээ байгуулсан нь тогтоогджээ. Албаныхны мэдээлж буйгаар бөөний үнээс 35 төгрөгөөр өндөр үнээр дээрх хоёр компаниас шатахуун худалдаж авсан байна. Энэ нь эргээд автобусны тасалбарын үнэ буурах боломжийг хаасан хэмээн үзэж байгаа аж.