Халуун бүгчим өдөр малгайгүй/шүхэргүй удаан хугацаагаар байж үүний зэрэгцээ шингэн дутагдсны улмаас биеийн дулаан зохицуулгын систем алдагдаж наршилт үүсдэг.

Heat stroke буюу наршилт гэдгийг анагаах ухаад биеийн ерөнхий температур 40.5ºC-ээс ихсэхийг хэлдэг. Наршилтын үед төв мэдрэлийн тогтолцоог хамарсан хүндрэл үүсгэх аюултай бөгөөд яаралтай тусламж үзүүлэх шаардлагатай.

Наршилтын үед илрэх шинж тэмдгүүд:

• Хамгийн гол шинж бол биеийн температур 40.5ºС-ээс ихсэх
• Хамгийн эхний шинж тэмдэг муужрах байж болно.
• Толгой өвдөх
• Толгой эргэх, нүд бүрэлзэх
• Бие халуун боловч хөлс гарахгүй.
• Арьс улаан, халуун бас хуурай байна.
• Булчин суларч, хөндүүрлэх
• Дотор муухайрч бөөлжих
• Зүрхний цохилт түргэсэх (Цохилт хүчтэй эсвэл сул аль нь ч байж болно.)
• Өнгөц, түргэн амьсгална.
• Үймрэх, орон зайн баримжаа алдагдах, гуйваж дайвах
•  
• Ухаан балартах

Наршилтын үед үзүүлэх анхны тусламж:

1. Хэрвээ та хэн нэгнийг эсвэл хүүхдээ наршсан гэж таамаглаж байгаа бол яаралтай түргэн тусламж дуудах хэрэгтэй. Эмнэлгийн тусламж авахгүй хойшлуулах нь амь насанд аюултай эрсдэл ч үүсгэж мэднэ гэдгийг та санаарай!
2. Эмнэлгийн тусламж ирэхийг хүлээх зуур хүйтэн, сэрүүхэн, сүүдэртэй газар аваачиж шаардлагагүй хувцаснуудыг тайлна.
3. Өвчтний биеийн температурыг бууруулах гэж хичээгээрэй. Ингэхдээ:
   1. Чийгтэй, нойтон алчуураа өвчтний арьсыг норгоно.
   2. Хүйтэн мөс, алчуурыг суга, цавь, хүзүү, нуруу зэрэг хамгийн их цусны судсаар баялаг газруудад байрлуулж, биеийн температурыг бууруулна.

Наршилтаас хэрхэн энгийн аргаар сэргийлэх вэ?

• Сул чөлөөтэй, нимгэн хувцас өмсөх
• Болж өгвөл том саравчтай малгай өмсөх. Хүүхдүүдээ гадаа тоглуулах гэж байгаа бол малгайг нь норгож өмсгөх
• SPF 30 болон түүнээс дээш нарны хамгаалалтын тос түрхэх
• Халуунд удаан байх бол шингэн зүйл уух
• Кафейн, спирт агуулсан уух зүйлсээс татгалзах. Учир нь эдгээр шингэнүүд биеэс ус гадагшлуулалтыг нэмэгдүүлж, өвчнийг улам хүндрүүлнэ.

Эх сурвалж: doctorpro.mn