Видео тоглоомын салбарын бас нэгэн мангас болох алдарт THQ энэ оны арваннэгдүгээр сарын 15-нд Saints Row: The Third тоглоомоо зах зээлд гаргахаар болжээ. Цагтаа алдарт Grand Theft Auto-гийн ширүүхэн өрсөлдөгч явсан энэхүү цувралын шинэ анги хүчирхэг бөгөөд гайхалтай хөгжүүлэлттэйгээр ийнхүү дахин мэндлэх нь. Nonlinear third-person shooter хэмээх тодотголтой тус тоглоомын хөгжүүлэгчээр Red Faction цувралыг хөгжүүлсэн мөн 2013 онд inSane хэмээх гайхалтай тоглоомыг зах зээлд гаргаж хувьсал хийнэ хэмээн зарлаад амжсан Volition,Inc-гийн авьяаслаг хамт олон ажиллаж байгаа гэнэ. Платформын хувьд их гурвал хэмээх PC, Playstation 3, Xbox 360 дээр гарах бөгөөд хөдөлгүүр нь CTG Engine, Havok Physics хэмээх шинэ үеийн хүчирхэг хөдөлгүүр дээр бүтээгдэж буй. Ирэх жил зах зээлд GTA-гийн ээлжит цувралаа гаргахаар зэхэж буй Rockstar-ийнхнаас THQ өрсөхөөр шийдсэн бололтой, ийнхүү тоглоомын нээлт хийх хугацаа наашлагдаж дөрөвхөн сарын дараа цахиур хагалах гэнэ шүү.