Сүхбаатарын талбай ойрын өдрүүдэд хөл хөдөлгөөн ихтэй байна. Монголын анхны төрт Улс байгуулагдсаны 2220 жил, Их Монгол Улс байгуулагдсаны 805 жил, Монгол Улс үндэсний тусгаар тогтнолоо сэргээн мандуулсны 100 жил, Ардын хувьсгалын 90 жил гээд тэгш ой давхцаж байгаатай холбоотойгоор олон шинэлэг арга хэмжээ зохион байгуулж байгаа билээ.

Үндэсний их баяр наадмыг зохион байгуулах комиссоос олон тэгш ой давхцаж буй онцлогтой уялдуулан энэ сарын 1-5-ны өдрүүдэд “Монгол туургатны өдрүүд”-ийг нийслэлийн төв талбайд өрнүүлж байна.

“Монгол гэрийн өдөрлөг”-өөр эхэлсэн энэ баяр өнөөдөр “Монгол цагаан идээний өдөрлөг”-өөр үргэлжилж байна. Өдөрлөгт сүү сүүн бүтээгдэхүүн үйлдвэрлэдэг хувь хүмүүс болон энэ чиглэлээр үйлдвэрлэл эрхэлдэг аж ахуйн нэгж ,фермерийн төлөөллүүд оролцож, өөрсдийн бүтээгдэхүүнээр үзэсгэлэн худалдаа гарган, иргэдэд үйлчилж байна. Өдөрлөгийн нээлтэнд ХХААХҮЯам, Нийслэлийн ЗДТГазар, СХД-ийн Засаг даргын тамгын газрын холбогдох албаны хүмүүс оролцсон юм.