Монголын хөлбөмбөгийн холбооноос зохион байгуулдаг “Хүрхээ” үндэсний дээд лигийн тэмцээний VI тойргийн тоглолтууд ирэх амралтын өдрүүдэд үргэлжлэн явагдана. МХБХ-ны Цэнгэлдэх хүрээлэн болон "ДЦС-4" талбайд нийт таван тоглолт болно.

“Эрчим” баг өнгөрсөн долоо хоногт “Хангарьд”-ын талбайд зочлон тоглохдоо хожлын гурван оноог аван тэргүүлж эхэлсэн. Тэгвэл тэд энэ удаа “Улаанбаатар”-тай тоглохоор оноолт таарчээ. “Улаанбаатар” өмнөх тоглолтод “Баянгол”-ыг 4:1-ээр хожсон ч хүснэгтэд сүүлээсээ хоёрт бичигдэж байгаа юм. Энэхүү тоглолт бямба гаригт “Эрчим”-ийн талбай дээр болно.

Сүүлийн хоёр тоглолтод хаалгандаа гоол алдалгүй хожил аваад байгаа “Хоромхон” хүснэгтийн сүүл мушгиж буй “УБ Мазаалайнууд”-тай тоглоно.

Тэгвэл "УБ Унаганууд", “Сэлэнгэ Пресс” ням гаригт болно. “Сэлэнгэ Пресс”-т А.Мөрөн, Ц.Түмэнжаргал нар эргэн ирсэн. Харин “УБ Унаганууд”-ын ахлагч П.Алтантулга, Э.Ганзориг нар бэртэлтэй байгаа. Гэвч тэд өмнөх тоглолтод “УБ Мазаалайнууд”-ыг 7:1-ээр хожсон бөгөөд Г.Ёндонжамц дөрвөн гоолыг оруулсан юм.

ХУВААРЬ:

VI.11 /Бямба/

• 12:00  – "Баянгол" – "Дэрэн" / МХБХ-ны Цэнгэлдэх хүрээлэн/
• 15:00 – "УБ Мазаалайнууд" – "Хоромхон" / МХБХ-ны Цэнгэлдэх хүрээлэн/
• 15:00 – "Эрчим" – "Улаанбаатар" /"ДЦС-4" талбай/

VI.12 /Ням/

• 12:00 – "Улаанбаатар сити" – "Хангарьд" /МХБХ-ны цэнгэлдэх хүрээлэн/
• 15:00 – "Сэлэнгэ Пресс" – "УБ Унаганууд" /МХБХ-ны цэнгэлдэх хүрээлэн/ тус тус тоглох хуваарьтай байна.

Монголын хөлбөмбөгийн холбооноос зохион байгуулдаг “Хүрхээ” үндэсний дээд лигийн тэмцээнд 10 баг өрсөлдөж байгаа бөгөөд ирэх аравдугаар сарыг хүртэл үргэлжлэн явагдах юм.

Ч.БОЛОР