Хятадын дарга асан Зян Земинийг нас барсан тухай цуу өчигдөр орой 11 цагийн үед тус улсын интернэт сайтуудаар тарсан байна. Гэвч хагас цагийн дараа дээрх мэдээллүүд алга болж, хятад ханзаар Зянь эсвэл үхэл гэсэн үгээр хайлт хийхэд “хуулийн дагуу таны хайсан илэрцийн үр дүнг харуулах боломжгүй” гэсэн тайлбар гарах болжээ. Харин Зянь нас барсан эсэх нь тодорхойгүй үлджээ. Өдгөө 84 настай, хүнд өвчтэй Зянь Земиний Хятадын коммунист намын 90 жилийн ойн албан ёсны ойн арга хэмжээний үеэр олон нийтэд харагдаагүйн шалтгаан дээрх цуу яриатай холбоотой байж ч мэдэх ажээ. Тэрбээр 2009 онд тус улсын 60 жилийн ойн ёслолын арга хэмжээнд оролцож байсан юм.

Мао Зэдунь, День Сяопин зэрэг Хятадын удирдагчдын халааг авч гарч ирсэн Зянь Земин том хүрээтэй харааны шил, даргар костюмтай имижээр барууны ертөнцөд танил болсон нэгэн. Түүний улс төр, эдийн засаг, соёлын шинэчлэлийн бодлого улс орныг эдийн засгийн хямралд оруулна гэдэг шүүмжлэлтэй тулгарч байжээ. Зян Земиний улс төр, нийгмийн талаар явуулж байсан бодлого одоо ч зарим улс төрчдийн хувьд ойлгомжгүй хэвээр үлдсэн юм. Зян Земинийг барууныхан засгийн эрхийг хэзээ шилжүүлж өгөхийг хамгийн сайн ухаарсан хүн гэдэг. Хятадын дарга, Коммунист намын ерөнхий нарийн бичгийн даргын бүрэн эрхийн хугацаа дуусахад тэрбээр албан тушаалаа Ху Жинтаод хүлээлгэн өгсөн билээ.