”Акедеми Авардс”-ыг “Содура” өнгөллөө

Монголын кино урлагийн шилдгийг тодруулах "Акедеми Авардс-2016" наадмын шагнал гардуулах хүндэтгэлийн ёслол өчигдөр /2016.06.04/ “Их тэнгэр цогцолбор”-т болж өндөрлөлөө. Тус наадмаас “Содура” уран сайхны киноны уран бүтээлчид зургаан номинацид шилдгээр тодорч, “Шилдгийн шилдэг уран бүтээл”-ийн шагналыг хүртсэн юм.

“Содура” уран сайхны киноны “Шилдэг туслах эрэгтэй дүр”-ээр жүжигчин С.Ариунбямба шалгарсан бөгөөд “Анхнаасаа киноны зохиолыг бичихдээ түүнд зориулж бичсэн юм” хэмээн тус киноны найруулагч Б.Жаргалсайхан өгүүлж, шагналыг түүний өмнөөс авсан юм. Харин тус киноны удганы дүрийг тун чадварлагаар бүтээсэн жүжигчин С.Болормаа “Шилдэг туслах эмэгтэй дүр”-ээр шалгарч, түүний дүү жүжигчин С.Болд-Эрдэнэ баяр хүргэж, эгчийгээ тайзнаа хөтлөн гаргав.

Монголын үндэсний кино урлагийн академиас зургаа дахь жилдээ зохион байгуулж уг наадамд нийт 20 уран сайхны кино, дөрвөн богино хэмжээний кино 17 номинациар өрсөлдөж, шилдгүүдээ тодрууллаа. Харин энэ жилийн наадамд баримтат киноны төрлөөр хоёрхон уран бүтээл оролцох хүсэлтээ ирүүлсэн учраас наадамд өрсөлдөөгүй байна.

Үзэгчдийн дунд хүлээлттэй байсан “Үргээлэг 2” уран сайхны киноны хувьд “Шилдэг хөрөнгө оруулагч”, “Шилдэг зохиол” гэсэн хоёр номинацийн эзэн болсон. Харин “Lovers” уран сайхны киноны найруулагч Ж.Сэнгэдорж шилдгээр тодорч, тус киноны гол дүрийн эмэгтэй жүжигчин Д.Гэрэлмаа “Шилдэг эмэгтэй гол дүр”-ээр шалгарсан бол арны албаныхнаас “Шилдэг зураглаач”, “Шилдэг монтаж” гэсэн номинацийн эзэн болж, “Содура”-гийн дараа жагслаа.

Мөн “Атганд үлдсэн эрдэнэ” уран сайхны киноны хувьд “Шилдэг эрэгтэй гол дүр”, “Шилдэг хөгжмийн зохиолч” гэсэн төрлөөр шилдгээр тодров. Жил ирэх тусам наадамд өрсөлдөж буй уран бүтээлүүд чанаржиж, тооны хувьд өсөж байгааг тус наадмын зохион байгуулагчид онцолж байв.

Энэ жилээс эхлэн нэрт кино найруулагч Х.Дамдины нэрэмжит “Шилдэг уран бүтээлч”-ийг шалгаруулж байгаа бөгөөд энэхүү шагналыг “Хувьсал” продакшны найруулагч У.Уранчимэг хүртсэн юм.