Пабло Пикассогийн балын харандаагаар зурсан хэдэн зуун мянган долларын үнэд хүрэх зургийг Сан Францискогийн Уйнстейний уран зургийн галерейгаас нэгэн эр мягмар гаригт хулгайлан зугтжээ. Галерейн ажилтнуудын мэдээлснээр "Tete de Femme" хэмээх уг зургийг Пикассо 1965 онд зурсан ба түүний чанартай сайн бүтээлүүдийн тоонд ордог аж. Цагдаа нар хулгайчийг хараахан барьж чадаагүй байгаа ч, хулгайч зургийг ямар нэг байдлаар эргүүлэн зарах боломжгүй гэж үзэж байна. Гэмт этгээдийг харсан хүмүүс түүний гадаад төрхийг дүрслэхдээ 30 эргэм настай бөгөөд арьсан гутал өмсч, нарны хар шил зүүсэн байсан гэжээ.

Харин Пикассогийн бүтээлээс өөр алдартай зураачдын бүтээл галерейгаас алдагдаагүй бөгөөд уг галерейд Марк Шагал, Салвадор Дали, Жуан Миро зэрэг зураачдын бүтээлүүд хадгалагдаж, олны нүдэнд толилуулж байна.