Монголын нийгэмд засч залруулах, илүү сайжруулах олон зүйл бий. Тэр асуудал болгон шийдэл хүлээж байгаа. Энэ шийдлийг олоход дөхөм болох санал санаачилга гаргаж, олон нийтэд мэдээлсэн эрхмийн үг энэ буланд байх юм.

“Банкны хадгаламж эзэмшигчийн халдашгүй байдал гэсэн ойлголт Монголд дутмаг байдаг. Монгол Улсад хэн нэгний эзэмшиж байгаа банкны данс руу нэвтэрч болох 18 хуулийн заалт байдаг.  Эрүү, Иргэний, Банкны, Захиргааны гэх мэт хуулийн дагуу 18 шахуу эрх бүхий субьект таны данс руу дураараа нэвтэрч, мэдээлэл авч, шалгаж, битүүмжлэх хураах эрхтэй. Ийм эрх зүйн орчинтой болохоор бизнес эрхлэгчид оффшор бүсэд компани нээх, гадны банкинд данс эзэмших нь буруу биш ээ. Монгол Улс өөрөө банкны систем, үйлчилгээ нь халдашгүй, эдийн засаг, хууль эрх зүй, татварын орчин таатай, улс төр нь тогтвортой бол  гадны банкинд мөнгөө аваачаад  хийх хүн гарахгүй. Манай эрх зүйн орчин маш тааламжгүй учраас л бизнес эрхлэгчид ийм сонголт хийхэд хүрч байна гэсэн үг. Харин улстөрчид үүнийг зөв хараад, эдийн засгийн нэг том хөшүүрэг болгож өөрчлөх ёстой юм. Монголын арилжааны банкууд  хувь хүний дансны халдашгүй байдлыг бүрэн хангаж чадвал монголчуудаас гадна гадаадынхны олон их наяд доллар манайд хадгалуулах боломж үүснэ.”

Эх сурвалж: www.news.mn

“Театр урлаг нь хөгжөөд ирвэл ард түмэн аяндаа араас дагаад гэгээрнэ. Бодлоготой, хяналттай уран бүтээл туурвих ёстой. Одоо хэн хүссэн бүхэн дуртай сэдвээрээ кино хийж байна. Телевизүүдээр хэлж ярьж, харуулж болохгүй мэдээ, нэвтрүүлэг, кино ямар ч хяналтгүй гарч байна. Гэтэл тэр нь хүүхэд залууст ямар үлгэр дууриалал өгч байгааг анхаарах ёстой. Бидний хойч ирээдүй болсон хүүхэд багачууд маань Монголынхоо өв соёл, үүх түүх, үлгэр домгоо мэддэг байх ёстой. Хүүхдүүдийнхээ ирээдүйг бодохын тулд одоо төр засаг телевиз, кино урлагаа хяналтдаа авах хэрэгтэй байгаа юм. Төр төмөр нүүртэй гэдэг. Хэрэгтэй гэж үзвэл одоо хувьд өгсөн салбаруудаасаа буцаагаад авах хэрэгтэй.”

Эх сурвалж: Засгийн газрын мэдээ