-УИХ-ын сонгуульд өрсөлдөх нэр дэвшигчдийг тодруулах хуулийн хугацаа дууссан ч энэ асуудал бид нараас үл хамаараад СЕХ-ны буруутай үйл ажиллагаанаас болсон учир Дээд шүүхийн шийдвэрийг биелүүлж, манай хүмүүсийг бүртгэж авах ёстой-

СЕХ-ноос ИЗНН-ыг УИХ-ын сонгуульд оролцуулахгүй байх шийдвэр гаргасан. Гэвч тус намынхан Захиргааны хэргийн шүүхэд хандаж, улмаар хоёр шатны шүүх хурал дамжиж байж эцэст нь ялалт байгуулжээ. Энэ асуудлаар ИЗНН-ын дарга Ц.Ганхуягаас тодрууллаа.

-ИЗНН-ынхан УИХ-ын сонгуульд оролцох эсэх асуудал юу болсон бэ? Шүүхийн шийдвэр аль талд гарсан бэ?

-Шүүх хурал хоёр шаттай явагдсан. Өнөөдөр буюу тавдугаар сарын 30-ны байдлаар Улсын дээд шүүхийн /УДШ/ шүүх хурал болж, хяналтын журмаар шийдвэр гаргасан. УДШ-ийн шийдвэр бол эцсийн шийдвэр юм. Тиймээс манай нам 2016 оны УИХ-ын сонгуульд оролцох эрхтэй боллоо. Бид нэгэнт хууль ёсны дагуу буруугүй гэдгээ тогтоолгосон тул ойрын хоёр, гурав хоногт багтаад нэр дэвшүүлэх ажиллагаагаа явуулна.

-УИХ-ын сонгуульд өрсөлдөх нэр дэвшигчдийг тодруулах хуулийн хугацаа дууссан. Гэхдээ СЕХ танай намын нэр дэвшигчдийг бүртгэх боломжтой гэсэн үг үү?

-Тийм. Энэ асуудал бид нараас үл хамаараад СЕХ-ны буруутай үйл ажиллагаанаас болсон учир УДШ-ийн шийдвэрийг биелүүлж, манай хүмүүсийг бүртгэж авах ёстой.

-УИХ-ын сонгуульд хэдэн тойрогт өрсөлдөх вэ?

-Энэ талаар одоохондоо ярих эрт байна. Яагаад гэвэл СЕХ-ны үйл ажиллагаанаас болоод манай намын зарим гишүүд өөр намд элсэж, УИХ-ын сонгуульд нэр дэвшсэн байна. Бид бүхэн Монгол оронд өөрчлөлт шинэчлэл хийх, Үндсэн хуулийг шинэчлэх, төрийг засах үүрэгт чин сэтгэлээ зориулж байгаа зөв хүмүүсийг дэвшүүлэх бодлого барьж ажиллана.

-УИХ-ын гишүүн С.Дэмбэрэл ИЗНН-аас гарч, Ардчилсан намд элссэн. Тэрээр ИЗНН-даа эргэж ороод, сонгуульд оролцох боломжтой болов уу?

-Үгүй. Мэдэхгүй өөрөөс нь асуух хэрэгтэй. Яагаад гэвэл өөрөө намаасаа гарсан. УДШ-ээс түүнийг ИЗНН-ын даргаас хассан. Хоёрдугаарт, Ардчилсан намын ҮЗХ-ны гишүүн болчихсон гэж би ойлгож байна.

-УИХ-ын гишүүн С.Дэмбэрэл эргээд ИЗНН-д орох хүсэлтэй байвал хүлээж авах уу?

-Манай намд ямар нэгэн хаалт байхгүй. Ямар ч хүн намын дүрэм хүлээн зөвшөөрөх ёстой. Зарчимтай байх ёстой. Гуйвж дайвдаг байх ёсгүй. Зарчимтай, үнэнч, үнэт зүйлийг дээдэлдэг бол хэн ч, ямар ч хүн намын гишүүн болоход нээлттэй.

-УИХ-ын сонгуульд ялалт байгуулах боломжтой хүмүүсээ өөр намд алдчихсан юм биш биз дээ?

-Би тэгж болохгүй байна.

-Та УИХ-ын сонгуульд нэр дэвших үү?

-Би нэр дэвшинэ.

-Аль тойрогт вэ?

-Намын нөхөдтэйгөө ярьж байж шийднэ.

-УИХ-ын гишүүн С.Оюун хэлэхдээ “Ганхуяг бид хоёр сонгуульд өрсөлдөхгүй. Одоо шинэ нүүр царай хэрэгтэй” гэж байсан. Та өмнө нь сонгуульд өрсөлдөхгүй гэж байсан юм биш үү?

-Би өөрөө өөрийнхөө асуудлыг мэднэ. Намынхаа Үндсэний хорооны хурал дээр “нам дангаараар сонгуульд оролцохоор бол би нэр дэвшинэ” гэдгээ илэрхийлж байсан.

-ИЗНН-ыг гурван даргатай болохоор аливаа асуудалд гурван тийш хараад суучихдаг гэж улс төр судлаачид шүүмжилдэг. Үүнтэй та санал нийлж байна уу?

-Би энэ удаад хувь хүмүүсийн үзэл бодол, байр суурийн талаар хэлмээргүй байна. Яагаад гэвэл нэгэнт тэд сонголт хийгээд, өөр намд элсээд явсан. Энэ бол хувь хүний сонголт юм. Тэгээд ч сонгууль дөхөж байхад янз бүрийн юм яриад хэрэггүй байх. Гэхдээ ИЗНН-ынхан УИХ-ын сонгуульд оролцох явцад гай болсон гэдгийг хэлэх ёстой. Бид сонгуульд оролцох эрхээ олж авсан нь хамгийн үнэт зүйл юм гэж би ойлгож байна.