БОНХАЖЯ-ы харъяа “Торгоны замын аялал жуулчлал” төслийн нэгжээс аялал жуулчлалын үйл ажиллагаа эрхэлдэг байгууллагуудад судалгаа, мэдээллийн дэмжлэг үзүүлэх зорилгоор судалгааны үр дүнг танилцуулах цуврал сургалт, семинаруудыг зохион байгуулдаг билээ.

Энэ удаагийн зочноор тус төслийн удирдагч, доктор Д.Гансүх /Ph.D/ оролцон “Торгоны замын аялал жуулчлал ба Монгол улс” сэдвээр илтгэл тавилаа.  

Илтгэлийн хүрээнд Торгоны замын аялал жуулчлалын тухай ойлголт, сүүлийн үеийн статистик мэдээлэл бүхий Торгоны замын зах зээлийн судалгаа, шинээр гэж хэлж болохуйц нүүдлийн аялал жуулчлалын концепцийн эхний шатны боловсруулалтын үйл явц,  түүнчлэн Торгоны замын аялал жуулчлалд аялал жуулчлалын салбарын төр, хувийн хэвшлийнхэн хэрхэн оролцох талаарх мэдээллүүдийг өгснөөс гадна оролцогчидтой харилцан яриа өрнүүлэн санал, зөвлөмжүүдийг солилцлоо.

Сургалтанд аялал жуулчлалын тур оператор байгууллагуудаас гадна салбарын эрдэмтэн багш судлаач оюутнуудын нийт 50 орчим хүн оролцлоо. Энэ удаагийн сургалтаар төслийн нэгжийн цуврал сургалтууд дуусч байгаа бөгөөд сургалтуудын илтгэлүүдийг эмхэтгэн хэвлүүлж аялал жуулчлалын салбарынханд удахгүй хүргэх болно.

Түүнчлэн энэ оны 10 сард Улаанбаатар хотноо “Нүүдлийн аялал жуулчлал ба хотуудын тогтвортой хөгжил” сэдэвт Торгоны замын олон улсын бага хурал болох юм байна.

 А.АМАР