Улсын Дээд шүүхийн иргэний хэргийн шүүх өнөөдрийн хуралдаанаар Монголын Ногоон намын дүрэмд нэмэлт, өөрчлөлт оруулсныг бүртгүүлэх тухай Д.Басандорж, О.Бум-Ялагч нарын хүсэлтийг хянан хэлэлцээд бүртгэхээс татгалзлаа.

Монголын Ногоон намын өнгөрөгч зургадугаар сарын 18-ны өдөр хуралдсан ээлжит Их хурлаар баталсан гэх дүрмийн нэмэлт, өөрчлөлтийн зарим заалт нь тухайн хурлаар хэлэлцэгдээгүй, хэлэлцсэн гэх хэдий ч хурлын тэмдэглэлд тусгагдаагүй зэрэг нь ийнхүү бүртгэхээс татгалзах шалтгаан болжээ.

Түүнчлэн Улс төрийн намын тухай хуулийн тавдугаар зүйлд заасан нам өөрийн үйл ажиллагаандаа баримталвал зохих зарчмуудыг баримталж их хурлаа хийсэн гэж үзэхэд учир дутагдалтай болсныг Дээд шүүхийн тогтоолд дурдсан байна.