“Хүн цаг хугацаанаас, харин цаг хугацаа пирамидаас айдаг” хэмээдэг алдарт пирамидуудын өлгий Египет орны тухай сонирхолтой эдийн засаг буландаа өгүүлж байна.  

• Египетийн нийт газар нутгийн хэмжээ Аляскийн талтай тэнцэнэ.

• 84.5 сая хүн амтай Египетийн хүн амын олонхыг 30-аас доош насныхан эзэлдэг.

• 30-аас доош насны коллежийн боловсролтой залуусын дунд ажилгүйдлийн түвшин 30 хувьтай.

• Египет нь Ази, Африк, Европыг холбосон худалдаа, харилцаа холбооны төвд оршдог.1869 онд Суэцийн сувгийг нээснээр Египетийн ач холбогдол улам нэмэгджээ.

• Суэцийн сувгийн орлого, газрын тосны экспорт, аялал жуулчлалын салбар нь Египетийн эдийн засгийн гол эх үүсвэрүүд аж. Египет нь шингэрүүлсэн байгалийн хий экспортлогч зургаа дахь гол орон юм.

• Египетийг зорих жуулчдын тоо 2001-2008 оны хооронд хоёр дахин нэмэгджээ. Гэвч Синайн хойгт Оросын агаарын тээврийн онгоц террорист халдлагын улмаас сүйрсний дараа Египетийг зорих жуулчдын тоо өнгөрсөн хоёрдугаар сард 50 хувиар буурсан байна.

• Египетийн “EgyptAir” нь Африкийн хамгийн том агаарын тээврийн компани юм. Баасан гаригт “EgyptAir” компанийн “Airbus A321” онгоц Газар дундын тэнгист осолдсоноор 69 хүн амь үрэгдлээ.

• Египет улс 2008 онд Ойрхи-Дорнодын бүс нутагтаа шинэчлэгч орноор шалгарч байжээ. Египетийн ДНБ-ны өсөлт 2010-2011 оны хооронд 5.5 хувиар нэмэгдэж байв.

• Египетийн засгийн газар 2020 он гэхэд эрчим хүчний хэрэглээний 20 хувийг сэргээгдэх эх үүсвэрээс хангах зорилго тавьжээ.

Б.АНХТУЯА

Эх сурвалж: Dailynews