Жил гаруй хугацаанд АНУ-д аялж буй “Чингис хаан” үзэсгэлэн энэ сарын 2-нд Даллас хотод буудалласан тухай мэдээлсэн. XIII зууны үеийн дайчдын хөө хуяг, бамбай дуулга тэргүүтэй үзэсгэлэнгийн үзмэрүүдийг саяхан Төрийн ордны өмнөх Чингис хааны хөшөөний загвараар баяжуулжээ.

200 гаруй үзмэртэй үзэсгэлэнд XIII зууны үеийн баатруудын төрх, байлдааны үеийг дүрсэлсэн бичлэг, гар зургийг багтаасан тус үзэсгэлэн АНУ-ын Хьюстон, Денвер, Сан Хосе хот болон Сингапур улсад гарч 300 гаруй мянган үзэгчийн хүртээл болсон юм. Харин энэ удаад БСШУЯ, Монголын урлагийн зөвлөл, АНУ-ын “Динодон” компани хамтран тус үзэсгэлэнг долдугаар сарын 10-наас ирэх аравдугаар сарын 10 хүртэл Монголын үндэсний музейд дэлгэхээр болжээ. Энэ удаагийн үзэсгэлэн нь Үндэсний музей, Монгол цэргийн музей, Үндэсний номын сан, “Хархорум” музей болон ОХУ-ын музейгээс авчирсан үзмэр, эртний эдлэл цуглуулагчдад хадгалагдаж буй эд өлгийн зүйлсийг багтааснаараа онцлог ажээ.