Өнгөрсөн сарын 24-ний өглөө Дорнод аймгийн Халхгол сумын Ялалт хоёрдугаар багийн нутаг, Буйр нууранд /эрээс 400 орчим метрийн дотогш/ загасчилж явсан дөрвөн хүн завьтайгаа хөмөрч, амиа алдсан харамсалтай хэрэг гарсан. Осолдсон дөрвөн хүний нэг нь мөсөн дээр осгож нас барсан байдалтай байсныг Хилийн цэргийн 0306-р ангийн дугаар заставын хилчид завиар очиж эрэг дээр гаргасан юм. Харин дараа нь тавдугаар  сарын 08-нд 16 удаагийн шумбалт хийж, 17:40 цагийн үед 42 настай эрэгтэй Г-ийн цогцсыг гаргажээ. Түүнээс хойш үлдсэн хоёр хүний цогцсыг онцгой байдлын алба хаагчид хүч нэмэгдүүлэн өдийг хүртэл эрж хайсан ч олоогүй байгаа юм.

Онцгой байдлынхан өчигдөр л гэхэд зургаан удаа шумбалт хийж, завиар зургаан удаа эргүүл хийсэн байна. Эрэл ямар  ч амжилтгүй байгаагаас осолдсон хоёр иргэнийг эрэх эрлийг цааш үргэлжүүлэх боломжгүй болжээ. Ар гэрийнхнийх нь зүгээс аргагүй нөхцөл байдлыг ойлгон, эрлийг зогсоохыг зөвшөөрчээ.

Д.ЦЭЭЛ