Ардын хувьсгалын баяр наадмын өдрүүдэд иргэдэд үйлчлэх нийтийн зорчигч тээврийн үйлчилгээний  хуваарийг гаргажээ.

Долдугаар сарын 11,12-нд  амралтын өдрийн гаралтаар  баярын  тусгай хуваарийн дагуу, 13-17-ны өдрүүдэд өглөө 8:00-22:30 цагийн хооронд жирийн амралтын өдрийн гаралтаар  үйлчлэхээр болсон байна. Баярын өдрүүдэд 69 чиглэлд  их оврын 617, туслах 23 чиглэлд бага оврын 221, зуслангийн зургаан чиглэлд бага багтаамжийн 20, нийт 858 автобус үйлчилгээнд гарах аж.

Төв цэнгэлдэх хүрээлэн рүү долдугаар сарын 11,12-нд хотын 26 чиглэлээс Мохатма Гандийн гудамжаар 100, Төв цэнгэлдэхийн урдуур шинээр тавьсан замаар 109, нийт 209 их багтаамжийн автобус үйлчлэх юм байна. Харин Хүй долоо худаг руу 7 сарын 11,12-нд Төв цэнгэлдэх дотроос, 13-нд Драмын театрын өмнөх талбайгаас тус тус 20 их багтаамжийн автобус, 11, 12, 13-нд хотын “3, 4-р хороолол”, “7 буудал”, “5 шар”, “ХМК”, “Офицерүүдийн ордон” гэсэн таван  чиглэлээс тус бүр дөрөв нийт 20, “Хүй долоо худаг”  дээр  төмөр замын буудлаас Морь барианы газар хүртэл 10,  нийт 30 бага оврын автобус үйлчилгээнд гарна.