Испанийн шигшээ болон английн прэмьерлигийн Ливэрпүүл багийн довтлогч Фэрнандо Торрэс энэ улирлын тоглолтоо дуусгалаа. Учир нь “Нандо”-гийн өвдгөндөө авсан гэмтэл мэс засал хийхээс өөр аргагүй байдалд хүргэсэн аж. Ингэснээр Торрэс дор хаяж зургаан долоо хоног талбайд гарахгүй болсон бөгөөд энэ нь 4-р байрын төлөө тэмцэж байгаа Ливэрпүүлийн багт том гарз болж байгаа юм. Харин Испанийн шигшээгийн фэнүүдийн хувьд ДАШТ-ээс өмнө Торрэс улсынхаа шигшээд нэгдэх боломжтой гэсэн сайн мэдээг хувийн төлөөлөгч нь хэлсэн байна. Одоо 26 настай испани довтлогч энэ улирлын дундуур буюу 1-р сард мөн өвдгөндөө мэс засал хийлгэж байсан юм. Гэсэн ч Фэрнандо Торрэс прэмьерлигт 24 тоглолт хийхдээ 18 гоол, Европын лигт дөрвөн гоол нийт 22 гоолыг энэ улирлын туршид оруулаад байсан аж. Одоо Ливэрпүүл прэмьерлигийн 4-р байр болон Европын лигийн шигшээд шалгарахын төлөөх хүндхэн тулаануудыг хийх юм.