Монгол улсын филармони ирэх сараас “Хүүхдийн ертөнц” хөгжмийн хөтөлбөр хэрэгжүүлж эхлэх юм байна. Хүүхэд багачуудад хөгжмөөр дамжуулан, урлаг гоо зүйн боловсрол олгох зорилготой юм. Энэ хөтөлбөрийн хүрээнд ирэх сарын 7-нд Хүүхэлдэйн кинонуудын хөгжмийг “Баянмонгол” жааз найрал хөгжим удирдаач Б.Ганбатын удирдлагаар эгшиглүүлэх бол 28-нд “Хувдай ишигний паян үлгэр” симфони найрал хөгжмийг удирдаач Д.Нямдаш удирдан тоглуулна. Мөн 31-нд Морин хуурын чуулган “Амьтдын ертөнц” хүүхдийн уран бүтээлийн концерт тоглох юм.
Монгол улсын филармониос иргэд, олон нийтийн урлаг гоо зүйн боловсролыг дээшлүүлэх зорилгоор “Хөгжмийн боловсролын хөтөлбөр”-ийг хэрэгжүүлж буй бөгөөд тус хөтөлбөрийн хүрээнд 2016 онд нийт зургаан төсөл, хөтөлбөр хэрэгжүүлэхээр болжээ. “Хүүхдийн ертөнц” төсөл уг хөтөлбөрийн дөрөв дэх төсөл юм байна.
А.Сүрэн