УИХ-ын чуулганы нэгдсэн хуралдаанаар Үндсэн хуулийн цэцийн 05 дугаар дүгнэлтийг хэлэлцэхээр болж, танилцуулга хийн, гишүүд асуулт асуухаар кнопоо дараад байх үед УИХ дахь МАХН-МҮАН-ын Шударга ёс эвслийн бүлэг завсарлага авлаа.

Завсарлага авах болсон шалтгаанаа тус бүлгийн дэд дарга З.Баянсэлэнгэ “Цэцээс гаргасан пропорциональ тогтолцооны асуудлаарх дүгнэлтийг УИХ дахь МАХН-МҮАН-ын Шударга ёс эвслийн бүлэг ярилцаж байна. Ийм учраас тав хоногийн завсарлага хүсэж байна” гэв.

УИХ-ын даргын зүгээс “Болж өгвөл завсарлага авмааргүй байна. Сонгуулийн бэлтгэл хангахтай холбоотойгоор хугацаа тулж байна. УИХ намуудад нэрээ дэвшүүлэх боломж олгохгүй бол болохгүй байна” гэв.

УИХ-ын Төрийн байгуулалтын байнгын хорооны дарга А.Бакей “УИХ болоод аймаг, нийслэлийн сонгууль өдөр ирэх тусам ойртож байгаа үед завсарлага нь хуулиар зохицуулсан асуудалд онцгой нөлөөлөх шинжтэй байна. Иргэний шилжилт хөдөлгөөн энэ сарын 30-нд дуусах ёстой, нэр дэвшүүлэх ажиллагаа тулж ирчихээд байна.

Хуульд ийм асуудлаар завсарлага авах бол хугацаанд саад болохгүй байхаар авах ёстойг гишүүд анхаарахыг хүсэж байна” гэв.

Эцэст нь УИХ-ын дарга тав хоногийн завсарлага өгөөгүйг Шударга ёс эвслийн бүлгийн дэд даргад сануулснаар завсарлага өглөө.

Одоо чуулганы нэгдсэн хуралдаанаар Шүүх байгуулах тухай хуульд өөрчлөлт оруулах тухай хуулийн төслийг хэлэлцэж эхлээд байна.

Г.ДАРЬ