Олимпийн эрх олгох хүндийн өргөлтийн насанд хүрэгчдийн Ази тивийн аварга шалгаруулах тэмцээн энэ сарын 22-30-ны өдрүүдэд Узбекстаны Ташкент хотноо болно. Тус тэмцээнд манай улсаас эрэгтэй, эмэгтэй бүтэн байгаараө оролцох бөгөөд баг тамирчид өнөөдөр тус улсыг зорино.

Монголын багийн ахлагчаар МХӨХ-ны Ерөнхий нарийн бичгийн дарга Ч.Даваадорж, дасгалжуулагчаар улсын шигшээ багийн ахлах дасгалжуулагч Ц.Хосбаяр, эрэгтэй багийн ахлагчаар МХӨХ-ны дэд ерөнхийлөгч Л.Дашзэвэг, эмэгтэй багийн ахлагчаар МХӨХ-ны дэд ерөнхийлөгч О.Батсайхан нар томилогдсон. Мөн тус тэмцээний шүүгчээр олон улсын I зэргийн шүүгч Л.Одгэрэл ажиллах юм.

Олон улсын хүндийн өргөлтийн холбооны шинэчлэгдсэн дүрмийн дагуу багийн дүнгээр олимпийн эрхийг олгох бөгөөд тэмцээний сүүлийн өдөр РИО-г зорих баг тамирчид тодрох юм.

Багийн бүрэлдэхүүн:

Эрэгтэй:

56 кг: ОУХМ Ө.Чагнаадорж

62 кг: ОУХМ Э.Мөнхдөл, Б.Баярням

69 кг: Спортын дэд мастер Э.Оюунбат

77 кг: Спортын мастер Ч.Очирхуяг, спортын дэд мастер Ө.Баянмөнх

85 кг: Спортын дэд мастер Б.Цэнд-Аюуш, спортын мастер Б.Гантулга болон нөөц тамирчнаар I зэрэгтэй Б.Нямчулуун

Эмэгтэй:

48 кг: ОУХМ Б.Золбоо, ОУХМ Ч.Нямзул

53 кг: ОУХМ А.Бум-Аюуш

63 кг: ОУХМ Т.Анужин

75 кг: ОУХМ М.Анхцэцэг /ДАШТ-ий VIII, X, Дэлхийн залуучуудын олимпийн IV байр/, ОУХМ Б.Энхтамир

+75 кг: ОУХМ Э.Билэгсайхан, ОУХМ Д.Зима/нөөц/ тус тус өрсөлдөнө.

Дашрамд, энэ удаагийн олимпийн эрхийн тэмцээнд оролцох баг тамирчдыг "Говь" компани болон "Adidas" брэнд өөрсдийн хувцсаа бэлэглэж, тэдэнд спортын өндөр амжилтыг хүслээ.

Ч.БОЛОР