“Монголын телевизүүд”-ийн ээлжит форум өнөөдөр эхэллээ. Хоёр өдөр үргэлжлэх тус чуулганаар “Контентын үнэлэмж Монголд” ямар түвшинд явааг хэлэлцэж, үзэгчдийн тоогоо алдах болсон телевизүүд хэрхэн мөнгө босгож, чанартай контент үйлдвэрлэдэг болох вэ гэдгээ ярилцаж байна. “Максима Медиа” компанийн судалгаанд  Улаанбаатар хотын дундаж үзэгч өдөрт 293 минутыг телевиз үзэхэд зарцуулдаг гэжээ. Энэ нь өмнөх 2014 онтой харьцуулахад 10 минутаар буюу гурван хувиар буурсан үзүүлэлт юм. Зөвхөн рекламынхаа орлогоор ажилчдаа цалинжуулж, мэдээ нэвтрүүлгээ үйлдвэрлэдэг телевизүүд ингэж үзэгчгүй болсон нь  хөрөнгөгүй болсонтой холбоотой гэж телевизийн захирлууд ярьж байна. Техник, технологийн хөгжлийг харуулсан сайн, чанартай контент телевизүүд хийдэг болохын тулд үзэгчдээсээ мөнгө авдаг болох хэрэгтэй. Ингэхдээ телевизүүдийн уран бүтээлчдийн бэлтгэж хийсэн бүтээгдэхүүнийг дамжуулдаг оператор компаниудын үзэгчдээс авдаг төлбөрийн тодорхой хувийг үзэгчдийн шалгуураар телевизүүд хуваан авах нь зөв. Муу мэдээ, нэвтрүүлэг хийсэн нь огт мөнгө авдаггүй, сайн бүтээл туурвисан нь мөнгөний ихэнхийг авдаг байх зарчмаар орлогоо шударга хуваадаг болохыг зарим телевизийн удирдлагууд санал болгож байна.