Интернет ертөнцөд нэгэн агуу том орон зайг эзэлдэг сайт бол яах аргагүй Википедиа билээ. Тэгвэл өнөө маргаашгүй тус сайтад Викилав (Wikilove) хэмээх товч бий болох гэнэ. Энэхүү товч бяцхан улаан зүрхний дүрстэй байх агаад сайтын баруун дээд буланд байрлана. Гэхдээ энэ товчийг онлайн толь бичигт бүртгүүлсэн хэрэглэгчид л ашиглах боломжтой юм байна. Маш сайн гэж үзсэн нийтлэлийн зохиогчид тэд энэ товчийг ашиглан талархлаа илэрхийлэх боломжтой болох аж. Зохиогчийн хувийн хуудас руу нь нэвтэрч энэ товчийг дарж болохоос гадна түүнд мэдээлэл, зураг зэргийг илгээж болох юм. Википедиагийн редакторуудыг бие биеийнхээ нийтлэлд үнэлгээ өгөх боломжоор хангахын тулд дээрх санаачлагыг гаргасан ажээ. Эдгээр редакторын дунд санал асуулга явуулахад 78 хувь нь хэрэглэгчдээс сайшаалын үг сонссон үедээ Википедиа төсөлд илүү олон цагийг зарцуулах хүсэлтэй болдог гэж хариулсан гэнэ. Одоогоор Википедиагийн туршилтын энэхүү сайтад http://prototype.wikimedia.org/release-en/Main_Page Викилав товч ажиллаж байна. Харин энэ сарын 29-ний лхагва гаригт Викилав систем Википедиагийн англи хувилбар дахь хуудсуудад нэвтэрч эхлэх аж. Ерөнхийдөө Викилав бол бидний сайн мэдэх Like товч юм. Like товчийг анх Facebook 2010 онд санаачлан бий болгосон бол энэ жил Google компани “+1” гэсэн товчийг ажиллуулж эхэлсэн түүхтэй билээ.