Сонгуулийн тогтолцоог тодорхой бол­го­хоор УИХ дахь Ардын нам болон Ард­чил­сан на­мын бүлгээс хамтарч ажилласан ажлын хэсгийнхэн зөвшилцөлд хүрчээ. Хоёр намын бүлэг өөрс­дийн сонгосон сонгуулийн тогтолцоог хамгаалсан байр суурь дээр хатуу зогсож байгаа учир бүх нийтийн санал асуулга явуулж, ард түмнээр маргаанаа таслуулах хувилбар дээр санал нэгдсэн аж. Энэ талаар УИХ дахь Ардын намын бүлгийн дарга Ө.Энхтүвшин өчигдөр мэдээлэл хийсэн юм. Тэрбээр “Хоёр намаас гарсан ажлын хэсгийнхэн өнөөдөр /өчигдөр/ зөвшилцөлд хүрсэн гэж ойлгож болно. Ардын намын бүлгийн хуралдаанаар “Сонгуулийн тогтолцоог ард түмний санал асуулгаар шийдэх нь зөв юм байна” гэсэн санал гаргаж, ажлын хэсгийнхнээр дамжуулж Ардчилсан намынханд дуулгасан. Харин Ард­чилсан намынхан бидний саналыг хүлээн зөв­шөөрсөн байна. Дөнгөж сая Ардын на­мын Удирдах зөвлөлийн хуралдаанаар энэ асуудлыг танилцуулж, зөвшөөрсөн хариу авлаа. Тиймээс энэ амралтын өдрүүдэд са­нал асуулгыг ямар журмаар явуулахыг ший­дэх юм. Мөн ямар асуултууд орохыг ч ха­рилцан зөвшилцсөний үндсэн дээр шийднэ. Сонгуулийн тухай хуульд нэмэлт өөрчлөлт оруулах тухай хуулийн төслөөс гадна Үндсэн хуульд нэмэлт өөрчлөлт оруулах эсэх нь нэлээд маргаантай байгаа. Тиймээс Үндсэн хуульд ямар өөрчлөлт оруулах шаардлагатай байгааг ч ард түмний санал асуулгаар тодорхойлохоор болсон” хэмээсэн юм.

Энэ үеэр түүнээс зарим зүйлийг тодруулсан юм.

-Дээрх шийдвэрийг бүлгийн хуралдаа­наас гаргасан гэж байна. Гэтэл Э.Бат-Үүл ги­шүүн гол шийдвэрийг Ардын намын Удирдах зөвлөл гаргаж, бүлгийнхэн дэмжиж байна гэж байгаа. Энэ шийдвэрийг Удирдах зөвлөлийн хуралдаанаас гаргаагүй юу?

-Удирдах зөвлөлийн хуралдаан сая энэ асуудлыг сонсож, дэмжсэн. Үүнийг Удирдах зөвлөлийн хуралдаанд танилцуулахаас өмнө бүлгийн хуралдаанаар хэлэлцэж, ажлын хэсгийнхэнд танилцуулсан байсан.

-Ард түмний санал асуулга явуулахаар бол­сон бол Сонгуулийн тухай хуульд нэмэлт өөрч­лөлт оруулах тухай хуулийн төслийг нам­рын чуулганаар хэлэлцэж таарах нь ээ?

-Энэ амралтын өдрүүдээр техникийн чанартай асуудлуудыг цэгцэлж, чуулганы нэгдсэн хуралдаанд энэ асуудлыг оруулах байх гэж бодож байна. Тиймээс намрын чуулганаар л Сонгуулийн тухай хуульд нэмэлт өөрчлөлт оруулах тухай хуулийн төслийг хэлэлцэж, баталж таарах нь.