Монголтой өрийн асуудлаар нааш­тай ааш авир гаргах үед нь манайхан “ Орос шиг л бай л даа” гэж хүртэл хошин үг гаргаж байсан тэр цаг үе өнгөрсөн бололтой. “Ах нар” өр зээ­лийн асуу­далдаа нэлээд чанга хатуу хан­даж эхэлсэн тухай сүүлийн үеийн мэдээллээр байнга гарах болжээ.

Өчигдрөөс эхлэн Орос улс Белорусьт нийлүүлдэг цахил­гаан эрчим хүчээ тасалж  орхи­сон байна. Белорусь улс нэг өдрийн хэрэгцээний эрчим хүч­­ний­хээ 12 хувийг ОХУ-аас нийлүүлдэг бөгөөд өнгөрсөн гурван сарын төлбөрөө төлөөгүй гэсэн шалтгаанаар оросын тал ийнхүү эрчим хүчээ тасалсан байна. Зарим мэдээллээс үзвэл Белорусь улс ОХУ-д цахилгаан эрчим хүч авсныхаа төлөө 800 сая ам.долларыг төлж бараг­дуулах учиртай байжээ.

 Хэдийгээр тус улс цахил­гааны тасалд­лыг дотооддоо га­р­гаж байгаа эрчим хүчний нөөцөөр нөхсөн ч энэ нь мөн л ОХУ-аас нийлүүлж байгаа мазут болон байгалийн хийнээс эх үүсвэртэй байгаа юм байна. Нөгөө талаар дотооддоо цахил­гаан эрчим хүч үйлдвэрлэх нь экспортоор ОХУ-аас авахаас үнэ­тэй тусч байгаа ажээ.

Тэгвэл Хятад улс ч бас өчигд­рөөс эхлэн Оростой данс тооцооны асуудал үүсгээд авчээ. ОХУ болон Хятадын хооронд нефть нийлүүлэх гэрээг анх 2009  онд байгуулсан байна. Гэрээний дагуу оросын Роснефть болон Транснефть компаниуд жил бүр Хятадад 15 сая тонн нефтийг 2030 он хүртэл нийлүүлэхээр болж байгаа ажээ. Харин ийм үүрэг авсныхаа хариуд дээрхи компаниуд Хятад улсаас 10-15 тэрбум ам.долларын хөнгө­лөлт­тэй зээлийг авч байгаа юм байна. 

Гэтэл Оросын газрын тос ний­лүүлэгчдийн мэдээлснээс үзэхэд Хята­дын тал Оросоос авсан нефтийнхээ үнийн дүн­гийн тодорхой хэсгийг дур мэдэн дутуу төлсөөр ирсэн юм байна.  Хятад улс Орост сар бүрийн 20-ны өдрөөр импортолж авсан нефтийнхээ төлбөрийг хийдэг бөгөөд оросын талаас гаргаж байгаа мэдээллээр бол энэ өм­нөх саруудын төлбөрөө их хэм­жээ­гээр дутаажээ.

Эхний улирлын болон өнгө­рөгч дөрөвдүгээр сард Оросоос авсан нефийнхээ төлбөрийг тө­­лөх­­дөө Хятад улс нэг тонн бүрээс нь 13 ам.долларыг дутуу төлж ирсэн аж. Тэгвэл өнгөрөгч тавдугаар сарын төлбөрөө тө­лөх­дөө мөн л тонн тус бүрээс нь 3 ам.долларыг дутуу төлсөн юм байна. Тийм боловч Оросын талаас Хятад руу нефть импортолж байгаа Роснефть бо­лон Транснефть компаниуд ний­­лүү­лэлтийн үүргээ цаг хуга­цаанд нь тасралтгүй биелүү­л­сээр ирсэн гэж мэдээлж байгаа юм.

Харин Хятадын талаас авч байгаа нефтийнхээ үнийг дангаараа ингэж буулгах болсноо албан ёсоор тайлбарлахгүй байгаа гэж оросын тал мэдээлээд үнийн зөрүүгээ яаралтай төлө­хийг сануулж эхэлсэн гэнэ. Дээрхи асуудлаас болж  Оросын компаниуд өөр хоорондоо ч өр зээлийн асуудалтай болж байгаа ажээ. Нефть дамжуулж байгаа Транснефть гэхэд хятадуудын “хумслалт”-аас болж одоогийн байдлаар ханган нийлүүлэгч Рос­нефть компанид 26 сая ам.дол­ларын өртэй болж иржээ.

Иймээс хэрэв хятадууд ду­туу хийсэн төлбөрөө нөхөн тө­лө­хгүй бол зарга үүсгэнэ гэж Транснефть анхааруулаад бай­гаа гэнэ. Оросын Транснефть компани Лондонгийн шүү­хэд хандахаар хэдийнээс бэлдэж эхлээд байгаа юм байна.
 
Түүнээс гадна оросын неф­тийн магнат болох Роснефть компани Транс­нефть компанид нийлүүлж байгаа нефть бү­тээ­г­­­­дэхүүнийх нь тоо хэм­жээ гаалийн шалган дээр тэмдэг­лэг­дэж байгаагаас өөр гарч байгаад эмзэг­лэж байгаагаа мэдэгдсэн байна.