МИАТ-ийн Ан-24 онгоц Хөвсгөл аймгийн Байшинт уулнаа осолдож, нисэх багийнхан болоод зорчигч нийлсэн 41 хүн амь насаа алдсан хэрэг гарсан нь 20 жилийн өмнөх явдал.

1995 оны намар есдүгээр сард гарсан тэрхүү ослоос цор ганц хүн амьд үлдсэн нь Хөвсгөл аймгийн Ханх сумын иргэн Санжаагийн Өлзийбаяр.

Хөвсгөл аймгийн төв Мөрөнгөөс холгүйхэн орших Байшинт  уулнаа унасан онгоцны нисэх багийнхан, зорчигчид болох  41 хүн  амиа алдсан юм.

Онгоц осолдсон газарт аврах багийнхныг очиход цор ганцаар амьд үлдсэн түүнийг “Ус уух хувьтай хүн” гэвэл дэндүү даруухан тодотгол болох биз ээ. Тиймээс ч бид түүнийг гарчигт дурдсанчлан  “Чөтгөрөөсч  азтай эр”  гэж нэрлэв. Тэрхүү азтан маань өнөөдөр төрсөн нутаг Хөвсгөл аймгийн Ханх сумандаа дэндүү эгэл даруухан аж төрж байна.