Татварын ерөнхий газрын дарга Б.Баттөмөрийн санаачилгаар Татварын алба дэргэдээ Бизнесийн зөвлөлтэй болсон билээ. Энэ зөвлөлийн анхдугаар хуралдаан өнөөдөр ТЕГ-ын байранд болжээ. Өнөөдөр болсон анхдугаар хуралдаанаар Бизнесийн зөвлөлийн даргыг сонгосон байна. Бизнесийн зөвлөлийн даргад “Гацуурт” ХХК-ийн захирал Л.Чинбат, “Урбанек” ХХК-ийн захирал Б.Лхагважав нарын нэрийг дэвшүүлснээс гишүүдийн саналаар Б.Лхагважав тус зөвлөлийг тэргүүлэхээр тогтжээ. Харин Бизнесийн зөвлөлийн дэд даргаар Татварын ерөнхий газрын дэд дарга Ч.Жигжидийг сонгосон байна. Энэхүү зөвлөл нь Агентлагийн эрхзүйн байдлын тухай хуулийн 8 дугаар зүйлийн 8.4 дэх заалтыг үндэслэн Татварын ерөнхий газрын дарга Б.Баттөмөрийн тушаалаар байгуулагдан ийнхүү үйл ажиллагаагаа албан ёсоор эхлүүлж байгаа аж.

Цаашид бизнесийн зөвлөл хоёр сард нэг удаа бүрэн бүрэлдэхүүнээр хуралдах бөгөөд татварын эрхзүйн орчныг төгөлдөржүүлэхэд өөрсдийн саналыг оруулж, Сангийн яаманд хүргүүлэх хэмжээнд ажиллах юм байна. Татварын ерөнхий газрын дэргэдэх Бизнесийн зөвлөл дараахь бүрэлдэхүүнтэй ажиллах юм байна. Үүнд,

1. Л.Ариунболд “Монгол 999” ХХК-ийн ТУЗ-ийн дарга
2. Л.Бадамцэцэг “Хадгаламж” банкны захирал
3. А.Ганхуяг “МСS” ХХК-ийн захирал
4. Х.Ганбаатар “МАОЭНХ”-ны гүйцэтгэх захирал
5. Б.Дуламсүрэн “Мобиком” ХХК-ийн Санхүү эрхэлсэн  дэд захирал
6. Б.Лхагважав “Урбанек” ХХК-ийн захирал
7. Л.Мөнхбат “Одкон холдинг” ХХК-ийн захирал
8. Б.Түвшин “АПУ” ХХК-ийн Санхүүгийн албаны захирал
9. Л.Чинбат “Гацуурт” ХХК-ийн захирал
10. Б.Чулуунбаатар “Моннис” ХХК-ийн дэд захирал
11. Ч.Чимэдсүрэн “ММНБИ”-ийн гүйцэтгэх захирал
12. Ц.Энхбаяр “Магнай трейд” ХХК-ийн дэд захирал нар тус зөвлөлийн гишүүнээр ажиллах юм.