Сангийн яамны зүгээс Засгийн газрын үнэт цаасны арилжаагаар татан төвлөрүүлсэн эх үүсвэр болох 72 тэрбум төгрөгийг Засгийн газрын 2009 оны 368 дугаар тогтоолоор батлагдсан “Төрийн албан хаагчдыг орон сууцны зээлд хамруулах журам”-ын дагуу Орон сууц санхүүжилтийн корпорацид дамжуулан зээлдүүлэхээр төлөвлөн ажиллаж байгаа юм. Энэ ажлын хүрээнд Засгийн газрын үнэт цаасны 36 тэрбум төгрөгийн арилжааг энэ сарын 8-ны өдөр Монголын хөрөнгийн биржээр дамжуулан амжилттай арилжаалсан бол дараагийн 36 тэрбум төгрөг босгох арилжаа ирэх сарын 6-ны өдөр болох юм байна. Нийтдээ 360 мянган ширхэг үнэт цаас гаргаж байгаагийн нэг бүрийх нь нэрлэсэн үнэ 100 мянган төгрөг байх аж. Засгийн газрын үнэт цаасны арилжааны хүүгийн төвшин өсөх, буурах нь Сангийн яамнаас ОССК-д дамжуулан зээлдүүлэх болон ОССК иргэдэд орон сууцны зээл олгох зэргийн тогтсон хүүгийн төвшинд өөрчлөлт орохгүй ажээ.