Видео тоглоомын мэдээ мэдээллийн томоохон сайт болох IGN орчин цагийн шилдэг 100 тоглоомыг тодруулж байна. Орчин цагийн гэх тодотголд мэдээж хэрэг 1990-ээд оны үеэс эхлэн өнөөг хүртэл төрөл бүрийн платформ дээр худалдаанд гарсан бүхий л видео тоглоомуудыг хамааруулан борлуулалт, хөгжүүлэлт гэх мэт тал талын үнэлэлт дүгнэлтийг нь харгалзан энэхүү жагсаалтыг гаргаж байгаа аж. Байгаа гэсний учир нь одоогийн байдлаар эхний 60 буюу 100-41-р байр хүртэлх тоглоомуудыг эрэмбэлсэн бөгөөд тун удахгүй эхний тоглоомуудын нэрсийг зарлахаар болжээ.  Шилдэг зуун тоглоомын жагсаалтын сүүлийг Demons Souls хэмээх тоглоом мушгисан ба бидний сайн мэдэхгүй олон олон тоглоомууд төгсгөлөөс дунд хэсэг хүртэл рейтингээрээ жагссан байна. Басхүү бидний сайн танил тоглоомууд ч сүүл хавьд элбэг байлаа. Ингээд та бүхэнд жагсаалтаас товчлон танилцуулья.

Жагсаалтын дугаар 94-т анх 2007 онд худалдаанд гарсан Crysis тоглоомын нэгдүгээр анги эрэмбэлэгджээ. Түүний дээр 93-т бидний сайн танил Angry Birds, 91-т Sims 3, 90-д Far Cry 2 тус тус байрлалаа эзэлсэн аж. Хэдийгээр 100 видео тоглоомоос сүүл мушгиж байгаа ч энэхүү супер тоглоомуудыг муу хэмээн дүгнэж болохгүй. 20-иод жилийн хугацаанд видео тоглоомын ертөнцөд бий болсон асар олон тоглоомуудаас IGN-ийн шилдэг 100-д багтана гэдэг үнэхээрийн их нэр хүнд бөгөөд амжилтын гэрч мөнөөсөө мөн гэдэгт эргэлзэх хэрэггүй. Ингээд 90-80 хүртэл бидний сайн мэдэхгүй нэрийг нь ч ховорхон сонссон тоглоомууд дээр дурдсан олны танил тоглоомуудаас илүүд тооцогдон эрэмбэлэгдсэн байна. 80-д алдарт Need for Speed цувралын Hot Pursuit жагсчээ. 77-д стратегийн тоглоомын супер төлөөлөгч Total war цувралын сүүлд гарсан анги болох Shogun Total war орсон байна. Тус тоглоом нь хэдийгээр энэ оны гуравдугаар сард нээлтээ хийсэн хэдий ч ийнхүү орчин цагийн шилдэг 100-д өлхөн багтаж амжсан байна. Мөн дөнгөж сарын өмнө нээлтээ хийсэн Witcher 2 буюу Assasins of Kings 75-д, 2009 онд байлдан дагуулж байсан Warhammer 40000: Dawn of War, өнгөрсөн онд гарсан алдарт Battlefield-ийн Bad Company 2 50-д, MMORPG-гийн супер тоглоом World of Warcraft: Cataclysm 42-т, Sid Meiers-ийн Civilization IV 41-т тус тус багтсан байна. Ингээд орчин цагийн шилдгийн шилдэг 40 видео тоглоомын нэрс тун удахгүй тодрохоор нууцлагдан үлдсэн ба видео тоглоомчид бүр тэдгээр тоглоомын дотор өөр өөрийн бодлоор байр эзлүүлэн таамагдаж буй бизээ.