Филиппинд мягмар гаригийн орой орж эхэлсэн бороо үерийн аюулд хүргэжээ. Борооны улмаас Панжи голын усны түвшин огцом дээшилж, эргээс халин Давао хотын ойролцоох тосгодыг сүйтгэсэн байна. Одоогоор үерийн гамшигт 25 хүн амиа алдаж, 264 өрх орон гэргүй болсон ба 12,000 гаруй айл үерт автсан байдалтай байна.

Лхагва гаригийн байдлаар үерийн усны түвшин гурван метр өндөрт хүрээд байсан ч, цаашид нэмж бороо орохгүй бол буурах хандлагатай байгаа аж. Үерт автсан иргэдийг аврах, яаралтай нүүлгэн шилжүүлэх ажилд Филиппиний эргийн хамгаалалтын ажилтнууд болон Давао хотын гал сөнөөгчид, аврах албаны ажилтнууд дайчлагдан ажиллаж байна.