"Зайсан толгой хэний толгой вэ?" гэдгийг мэдэхийн тулд бид бүхэн нилээд хэдэн газраар явсан байгаа. Яг албан ёсоороо бол Зайсан толгой Дархан цаазат газар нутагт хамаардаг Монгол Улсын Төрийн өмчийн мэдлийн газар юм байна. Харамсалтай нь өнөөгийн байдлаар "аялал жуулчлалын зориулалтаар ашиглана" гэж газар авсан ч зориулалтыг нь өөрчлөн хууль дүрмийг уландаа гишгэсэн бизнесменүүдийн "толгой" болжээ гэж хэлэхэд болохоор байна. Мөн Дархан цаазат газар нутаг дээр газар ашиглах зөвшөөрлийг салбар яам нь өгдөг ч Нийслэлийн өмчийн харилцааны газар, Мэргэжлийн хяналтын газрууд барилга барих зөвшөөрлийг нь олгодог хуулийн цоорхойг тэд сайн ашигладаг бололтой.