Ардын
урлагийн их наадмын нээлтэд зориулсан урлагийн тоглолт яг одоо
Сүхбаатарын талбайд үргэлжилж байна. Уг наадам ирэх долдугаар сарын 3-ны
өдөр хүртэл үргэлжлэх юм. Д.Сүхбаатарын талбайд болсон ёслолын
ажиллагаанд Тэргүүн шадар сайд Н.Алтанхуяг болон УИХ-ын дарга С.Дэмбэрэл
тэргүүтэй албаны хүмүүс оролцож, ардын авьяастнуудад хүндэтгэл
үзүүллээ. Ардын урлагийн их наадмын албан ёсны нээлтийн ажиллагаа
өнөөдөр 18:00 цагаас “Соёлын төв өргөө”-нд болно. Энэ удаагийн их
наадамд Баян-Өлгий, Булган, Архангай зэрэг 10 гаруй аймгийн төлөөлөл
оролцож байгаа. Ардын урлагийн их наадмын энэ жилийн шалгаруулалт аймаг,
бүс, нийслэл гэсэн гурван үе шаттайгаар үргэлжилсэн бөгөөд наадмын
хүрээнд яруу найраг, уртын дуу, үндэсний хөгжим, уран дархан, үйл урлах
урлаг, аман хуур зэрэг нийт 14 төрлөөр шалгаруулалт явуулсан байна.
Ардын авьяастнуудын эцсийн шалгаруулалт эдгээр өдрүүдэд үргэлжлэн
шилдгээ шалгаруулах юм. Наадамд мэргэжлийн байгууллагад ажилладаг уран
бүтээлчид оролцоогүйг сануулъя. Сонирхуулахад, Ардын урлагийн их наадмыг
манай улс өмнө нь 1966 оноос “Бүх ард түмний урлагийн үзлэг” нэртэйгээр
таван жил тутамд зохион байгуулж байгаа юм.

Зургийн цомгийг ЭНД дарж үзнэ үү.