Түүхт дөрвөн их ой давхацсан энэ жилийн баяр наадам ямархуу орчинд өрнөх бол. Баяр наадмыг зохион байгуу­лах комиссынхон  “Өнөө  жилийн   наадмыг өмнөх жилүү­дийнхээс илүү зохион байгуулна.  Бэлтгэлийг хангаж эхэлсэн” гэж мэдэгдсэн. Тэд ядаж л наадмын талбайд элдэв бараа битгий хэл, бэлэг дурсгалын зүйл ч заруулахгүй гэсэн. Энэ шийдвэр эхнээсээ эсэргүүцэлтэй тулгарч байгаа сурагтай. Гэхдээ нэгэнт гаргасан шийдвэрээ  өөрчлөхгүй  гэсэн хатуу байр суурьтай байгаагаа Баяр наадмыг зохион байгуулах комиссын гишүүд хэлсэн юм.  Комиссынхны цэнгэлдэхийн эргэн тойрон дахь зохион байгуулалттай холбогдуулан гаргасан шийдвэ­рүүдийн нэг нь энэ. Харин нөгөөх нь Төв цэнгэлдэхийн засвар тохижилтын ажилд 15 сая төгрөг зарцуулах тухай шийдвэр байв. Уг мөнгийг төлөвлөсөн ажлуудаа хийхэд зарцуулж буй. Цэнгэлдэх хүрээлэнгийн өнгө, наадам угтсан бэлтгэл ажил хэрхэн өрнөж байгааг өчигдөр сонирхлоо. Одоогоос 56 жилийн өмнө ашиглалтад орсон “хөгшин” цэнгэлдэхийг түүхт дөрвөн их ой давхацсан энэ жил зассан шиг засаж байгаа байлгүй гэж бодсоор очив. Харин очоод харахад нүдэнд тусах зүйл байсангүй. Ямартай ч цэнгэлдэхийн төв хаалгыг ногоон өнгөөр будаж, шавар нь ховхорч унасныг засаж байлаа. Засварын ажил хийж буй хүмүүсийн ойролцоо дөрвөн эрэгтэй зогсож байлаа. Тэднээс уг ажлыг хэн нь ахалж байгааг тодруулбал “Энэ хүнээс ч ярилцлага ав. Тэр хүнээс ч ав” гээд бие биенээрээ тоглох шинжтэй. Тэгж байснаа хөлчүүхэн царайтай, хөхөрсөн нүдтэй залуу нь “Төв хаалгыг будаж дууссан. Одоо бага зэрэг засварын ажил л үлдсэн” гэсэн юм. Хөлчүү царайтай эрсийн хийж буй засварын ажил удахгүй дуусна гэсэн. Харин тэд “Бусад хэсгийн засвар, тохижилтын ажлын талаар огт мэдэхгүй” гэсэн юм.

Дараа нь үзэгчдийн суудал, асар зэрэг дотоод тохижилтын ажлыг хэрхэн хийж байгааг сонирхохоор дотогш орлоо. Тэнд уг нь олон хүн байсан. Гэхдээ ихэнх нь талбай дээр бэлтгэл хийж буй гүйлтийн тамирчид. Засварын ажил хийж байгаагаас дөрвөн эмэгтэй л байв. Тэд тугны суурийг будаж байлаа. Ямартай ч өнгөрсөн жил цагаан өнгөтэй байсан  тугны суурь энэ жил ягаан өнгөтэй болж байгаа юм байна лээ. Наадмын дэвжээ аль хэдийнэ ногоорчихож. Зүлгийг тайрч, тэгшлэх ажлыг наадам дөхөхөөр буюу ирэх сарын 9-ний орчимд хийх ажээ. Наадмын талбай, иргэдийн суух асар, саравч урьдын л хэвээр байв. Ер нь бол өмнөх жилүүдэд хийдэг л будаг шунхны ажлуудаа давтаж байна. Хүмүүс “Наадамчдын суудаг сандлын дээгүүр тэр чигт нь сүүдрэвч барвал зүгээр”  гэх. Гэсэн ч цэнгэлдэхийг засах төсөвт үүний мөнгийг тусгаагүй.  Дотоод засварын ажлыг ахалж буй хүн нь биднийг очиход байхгүй байв. Тугны  суурийг будаж байсан эмэгтэйчүүдийн хэлж буйгаар үзэгчдийн сандлыг хамгийн түрүүнд буджээ. Одоо төв асарын “нүүр”-ийг будаад л дотоод заслын ажил дуусах аж. Харин дараа нь цэнгэлдэхийн гадна талын ханыг будах юм байна.  Ямартай ч тэд засварын ажлаа ирэх сарын 5-ны дотор дуусгах төлөвлөгөөтэй байгаа гэж байлаа.

Цэнгэлдэхийн 51 хувийг эзэмшдэг “Төв цэнгэлдэх” ХХК өөрийн хөрөн­гөөр зүүн талд нь автомашины талбай, худалдаа, үйлчилгээний зориулал­таар ашиглах асфальтан талбай барьж байгаа юм билээ. Одоо дөнгөж хөрсийг нь хуулж дуусаж байгаа аж. Биднийг очих үеэр засварын ажил хийж байгаа хүн байгаагүй. Гэхдээ энэхүү шороотой хэсгийг асфальтаар хучаад наадамчдын хөлөөр босдог шороо тоос багасна гэсэн бодол төрсөнгүй. Тоосоор дээлээ гоёдоггүй наадам ч гэж юу байх вэ. Харин энэ жил цэнгэлдэхийн зам дээр хашаа хатгасан “Сүлд” авто салоны хашаан дахь хоёр павилоныг цэвэрлэж, ариутгаад  хуушуурын цэгүүдийг төвлөрүүлэх бөгөөд гаднах хашаанд нь ширээ, сандал засах ажээ.