Олон улсын валютын сан тэргүүнээр Францын Сангийн сайд Кристин Лагардыг томиллоо. ОУВС мэдэгдэлдээ сангийн тэргүүнд нэр дэвшүүлсэн К.Лагард, Августин Карстен нар хэн хэн нь хүчтэй өрсөлдөгчид байсныг хүлээн зөвшөөрсөн байна.  К.Лагард ОУВС-гийн тэргүүнээр сонгогдоход АНУ, Европ төдийгүй зах зээл нь улам бүр хүрээгээ тэлж буй Энэтхэг, Хятад, Бразилийн дэмжлэгийг авч чадсан юм. ОУВС дээрх мэдэгдлийг гаргасны дараа К. Лагард “Twitter”-тээ ОУВС итгэл хүлээлгэж, тэргүүнээр сонгосонд талархаж байгаагаа илэрхийлсэн байна.

ОУВС-гийн тэргүүн асан Д.Стросс-Кан секс гэмт хэрэгт холбогдож, огцрох хүсэлтээ гаргасны  дараа сангийн удирдах зөвлөл шинэ тэргүүнийг сонгох ажлыг эхлүүлсэн юм. К.Лагард 1944 онд байгуулагдсан ОУВС-гийн тэргүүнээр сонгогдож буй анхны эмэгтэй болж байна. Хэдийгээр Ази, Латин Америкийн орнууд ОУВС-гийн тэргүүнийг Европоос томилдог  уламжлалыг эсэргүүцэж байсан боловч К.Лагард тэдний дэмжлэгийг авч чадсан байна. ОУВС-гийн тэргүүн К.Лагардын таван жилийн бүрэн эрхийн хугацаа ирэх долдугаар сарын 5-наас эхлэх юм. Түүний шийдвэрлэх эхний асуудал нь Грекийн өрийн хямралыг арилгахад Европын холбоотой хамтран ажиллаж, евро бүсийн орнуудын эдийн засгийг тогтворжуулах арга хэмжээ авах юм.