“Магнай трейд” компанийн хувьд карт болон талонтой хэрэглэгчдэдээ нэг удаа 30 хүртэлх литр хэмжээтэйгээр АИ-92 болон дизель түлшийг өгч байна. Тус компанийн аль ч салбарт бэлэн мөнгөөр дээрх хоёр нефть бүтээгдэхүүнийг худалдахгүй байгаа тухай маркетингийн менежер ярив. Тус компанийн талоныг гэрээтэй хэрэглэгчид худалдаж авах боломжтой бол карт нь Худалдаа хөгжлийн банкнаас гаргадаг “МТ” гэсэн карт буй гэнэ. Үүнийг энгийн хэрэглэгчид дээрх банкны аль ч салбараас авах боломжтой бөгөөд шинээр авахад 2500 төгрөгийн үнэтэй юм байна. Карт авах мэдүүлгээ гаргаснаас хойш ажлын 2-3 өдөрт багтан олгодог аж. Яагаад АИ-92-ын худалдааг хязгаарлах болсон тухайд “ОХУ-аас АИ-92 бензиний нийлүүлэлт эрс багассантай холбоотой” гэлээ.

“Петровис” компани байгаа нөөцдөө тулгуурлан, хиймэл хомсдол үүсгэхгүйн тулд урьдчилан сэргийлж хязгаарлалт тогтоон худалдаж байгаа гэлээ. Тус компани карттай болон гэрээт хэрэглэгчдэдээ АИ 92-ыг худалдаж байна.

Өнгөрсөн амралтын өдрүүдэд “Жаст ойл” компанийн гурван салбарт бэлэн мөнгөөр АИ-92 бензин худалдаж байсан ч өнөөдрөөс зогсоосон байна. Компанийн удирдлагууд нөөц, борлуулалтын дүнг харгалзан бэлэн мөнгөөр худалдах эсэхээ шийднэ гэлээ. Одоогийн байдлаар тус компани 100 мянга хүртэлх төгрөгийн талоныг борлуулж байгаа бөгөөд Хадгаламж банкны ямар ч төрлийн карттай хэрэглэгчид худалдан авалт хийх боломжтой юм байна. Гэхдээ карт болон талонтой хэрэглэгчдэд нэг удаа 20 мянган төгрөг хүртэлх барааны борлуулалт хийж байгаа ажээ.

“Шунхлай” компанийн борлуулалтын албаныхан “ОХУ-аас АИ-92 бензиний нийлүүлэлтийг сүүлийн хоёр сар хасалттай хийж байсан. Зургадугаар сард нийлүүлэлт бүр багассан байгаа. Тиймээс бид Газрын тосны газраас өгсөн даалгаврын дагуу байгаа нөөцдөө тааруулан худалдаж байна” гэсэн юм. Эднийх карт болон талонтой хэрэглэгчдэдээ АИ-92 бензинийг хамгийн дээд тал нь 20 мянган төгрөгт багтаан худалдаж байгаа гэнэ. Мөн шинээр карт гаргахгүй байгаа ажээ.