Америкийн жүжигчин Питер Фальк өнгөрсөн пүрэв гаригт  Беверли-Хиллс дэх өөрийн гэртээ таалал төгссөн тухай жүжигчний гэр бүлийн албан ёсны төлөөлөгч мэдэгдсэн байна. Фальк 83 настай байсан бөгөөд Альцгеймерийн өвчтэй байжээ.
“Коломбо” (“Columbo”) гэх телевизийн олон ангит киноны дэслэгч Коломбогийн дүр түүнийг алдаршуулжээ.  Фальк энэ кинонд 1971-1978 онд тогтмол, 1989-2003 онд үе үе тоглож ирсэн гэнэ. Энэ киног нь АНУ-аас гадна дэлхийн 26 оронд үзүүлсэн байлаа. Тэрээр таван удаа “Эмми” шагнал авч байсны дөрөв нь Коломбогийн дүрд олгогджээ. “Аллагын корпораци”, “Чимх ид шид” киногоор тэр хоёр удаа Оскарт нэр нь дэвшиж байв. Фальк хоёр удаа гэрлэсэн ба анхны гэрлэлтээс нь хоёр охин үлджээ.