УДБЭТ-ын энэ цагийн хун Б.Саруул, ханхүү О.Ганцоож нар өнөөдөр болох “Night of Ballet” гала тоглолтод оролцох аж. Тэд энэхүү тоглолтод П.И.Чайковскийн “Хунт нуур” балетийн хэсгээс бүжиж сонирхуулах юм. “Night Of Ballet” гала тоглолтыг АНУ-ын “Бостон балет” компанийн гоцлол бүжигчин, Монгол Улсын Гавьяат жүжигчин Д.Алтанхуягийн байгуулсан “Балетийн хөгжил сан”-гаас зохион байгуулж байгаа. Тус сангаас анх удаа олон улсын балетийн фестивалийг зохион байгуулж байгаа төдийгүй таван тивийн шилдэг балетчдыг Монголд урьж, сонгодог урлагт элэгтэй үзэгчдэд бэлэг барьсан. Тэд энэ сарын 19-нд “Хунт нуур” балетад гоцолсон бол өнөөдөр, маргааш болох гала тоглолтод орчин үеийн болон дэлхийн сонгодог балетийн хэсгээс бүжиж сонирхуулах юм.

Гавьяат жүжигчин Д.Алтанхуягийн хувьд ирэх долдугаар сар хүртэл эх орондоо байх юм. Харин долдугаар сарын сүүлд Японы театрт тоглолттой учир наадам өнгөрөөгөөд Японыг зорих аж. Сонирхуулахад маргааш болох гала тоглолтын дараа “Ivy” ресторанд Д.Алтанхуяг болон бусад дэлхийн шилдэг бүжигчидтэй танилцах VIP уулзалт болох юм. Энэхүү тусгай уулзалтад нэвтрэх тасалбар нь 100 ам.долларын үнэтэй байх нь.