“Хулгайн гэмт хэрэгтэй тэмцэх ажлыг эрчимжүүлэх нь” сэдэвт хуулийн байгуулагын ажилтнууд, судлаач эрдэмтдийн оролцсон онол практикийн бага хурал нийслэлийн төр захиргааны “Хангарьд” ордонд өчигдөр боллоо. Уг хурлаар нийслэлд үйлдэгдэж байгаа хулгайн гэмт хэргийн шалтгаан нөхцөл, нөлөөлөх хүчин зүйл, тэдгээрийг арилгах арга замын талаар ярилцлаа. Түүнчлэн хулгайн гэмт хэрэг үйлдсэн этгээдэд шүүхээс ноогдуулж байгаа ялын байдлыг судалж, цаашид хуулийн байгуулагаас авах арга хэмжээг тодорхойлох, урьдчилан сэргийлэх ажлын хүрээнд иргэд олон нийтийн оролцоог нэмэгдүүлэх зорилгоор зохион байгуулж байгаагаараа онцлогтой гэж байв. 

Онол практикийн бага хурлыг нээж НИТХ-ын дарга, Нийслэлийн гэмт хэргээс урьдчилан сэргийлэх ажлыг зохицуулах зөвлөлийн дарга Т.Билэгт хэлсэн үгэндээ он гарснаас хойш 5 сарын хугацаанд Улаанбаатар хотод 8547 гэмт хэрэг гарсны 29 хувь нь хулгайн гэмт хэрэг байна. Хэдийгээр өмнөх жилүүдтэй харьцуулахад энэ төрлийн гэмт хэргийн тоо буурсан үзүүлэлт гарч буй ч нэг хэргийн цаана иргэдийн хөрөнгө мөнгө буруу гартнуудын олз болж байна. Тухайлбал хулгайн гэмт хэргийн 45 хувийг л хохирогчдод нөхөн төлүүлдэг тухай статистик тоо нь иргэд хир хохирдогийн нотолгоо юм гэв. ЦЕГ-ын Мэдээлэл, судалгааны төвийн ахлах байцаагч, цагдаагийн ахлах дэслэгч Б. Мөнхдорж “Бусдын эд хөрөнгийг хулгайлах гэмт хэргийн өнөөгийн байдал” илтгэлдээ Монгол Улсад сүүлийн 10 жилд 200 мянган хулгайн гэмт хэрэг үйлдэгдэж энэхүү  гэмт хэргийн улмаас 350 тэрбум төгрөгийн хохирол учирсныг дуулгав. Эдгээрээс ердөө 20 хувийг хэрэг мөрдөн байцаах шатанд нөхөн төлүүлжээ. 10 жилээр гаргасан судалгаагаар сүүлийн үед гэмт хэргийн тоо буурч буй ч нийслэлд эсрэгээрээ нэмэгдэх хандлагатай байна гэсэн.  Энэ нь хүн амын төвлөрлийн төв нь нийслэл хот болж,  үүнийг дагаад гэмт хэрэг ихэсч байна гэж тайбарлав. Улаанбаатар Баянзүрх, Сонгинохайрхан, Баянгол дүүрэгт гэмт хэрэг их гардаг байна. Хулгайн гэмт хэрэг дотор  орон байр,  халаасны хулгай дийлэнхи хувийг эзэлж буйг танилцууллаа. Энэ илтгэлийн дараа Нийслэлийн прокурорын туслах Ч.Мөнхбат “Хулгайн гэмт хэрэгт ял шийтгэгдэн хорихоос суллагдсан ялтныг нийгэмшүүлэх асуудал” , НЦГ-ын Гэмт хэрэгтэй тэмцэх хэлтсийн хэргийн газрын үзлэг хариуцсан ахлах мэргэжилтэн Б.Жаргалсайхан “Хулгайн гэмт хэргийг илрүүлэх шинжлэх ухаан техникийн зарим арга” , Нийслэлийн прокурорын туслах Г.Жадамба “Бусдын эд хөрөнгө, хулгайлах гэмт хэрэг үйлдэгдэж байгаа шалтгаан нөхцөл түүнийг бууруулах талаар авах арга хэмжээ”-ний талаар тус тус илтгэл тавьж хэлэлцүүлж байна. Онол практикийн бага хуралд тавигдсан илтгэл, мэдээлэл, хэлэлцэгдсэн асуудлыг нэгтгэж зөвлөмж гарган танилцуулга бэлтгэх юм байна.