Монгол дахь НҮБ-ын суурин төлөөлөгчийн газраас малчдад хаягласан тусламжийг өнөөдөр Онцгой байдлын ерөнхий газар /ОБЕГ/-т гардуулан өглөө. “Онцгой байдлын үед зарцуулах НҮБ-ын нэгдсэн сан /CERF/”-гаас 2.4 сая ам.доллар босгож, өвөлжилт, хаваржилт хүндэрсэн аймаг, сумдын эмэгтэйчүүд, хүүхдүүдэд зориулан хүнс, хоол тэжээл, ариун цэвэр, эрүүл ахуйн бараа зэргийг илгээсэн байна.  Өнгөрсөн арванхоёрдугаар сараас хойш улсын хэмжээнд нийт малчин өрхийн 41 хувь нь зуданд өртөж, өвлийг зутруухан давсан билээ. Үүнээс 100-аас доош тооны малтай 11 800 өрхийн хаваржилтын байдал хүнд хэвээр байна. Тиймээс хаваржилт хүндэрсэн Увс, Баянхонгор, Архангай, Завхан, Дундговь, Сүхбаатар аймгийн 45 суманд амьдарч байгаа 1800 гаруй хүүхэд, 900 гаруй жирэмсэн болон хөхүүл эхэд НҮБ-ын дээрх тусламжийг хүргэх юм.

НҮБ-ын Хүүхдийн сангаас Эрүүл мэнд, спортын яам, Дэлхийн зөн олон улсын байгууллагатай хамтран хаваржилт хүндэрсэн дээрх сумдад байгаа 6 сартайгаас дарван нас есөн сартай хүүхдүүд болон жирэмсэн, хөхүүл эхэд зориулсан олон найрлагат бичил тэжээлийн бэлдмэлийг хүргүүлж байгаа юм. Энэхүү бэлдмэл нь 10 төрлийн амин дэм, 5 төрлийн эрдэс бодис агуулсан байдаг бөгөөд хоол тэжээлийн дуталд орохоос урьдчилан сэргийлнэ. Түүнчлэн дээрх сумдын өрхүүдэд хоол тэжээлийн хурц дутал илрүүлэх үзлэг явуулж, хоёроос доош настай хүүхэдтэй эцэг эх болох жирэмсэн, хөхүүл эхтэй айл өрхүүдэд хоол тэжээлийн зөвлөгөө өгөх юм.НҮБ-ын Хүн амын сангаас дээрх сумдад байгаа эмэгтэйчүүд, охидод зориулан 7962 ширхэг ариун цэвэр, эрүүл ахуйн багцыг (нэг өрхөд дунджаар 2 багц) хүргүүлэхээр болжээ. Уг багцад ариун цэврийн хэрэглэл, дотуур хувцас, оймс, хувцас, гар нүүрийн саван, нүүр гарын алчуур зэргээс гадна шүгэл,  гар чийдэн зэрэг хамгаалах хэрэгслүүд  ч багтжээ. Энэхүү багц нь гамшгийн үед охид, эмэгтэйчүүдийн онцгой хэрэгцээг харгалзан үзэж, тэдний ариун цэвэр, эрүүл ахуй болон аюулгүй байдлыг хангах, өөртөө итгэлтэй байлгах зорилготой гэнэ. Мөн хаваржилт хүндэрсэн сумдад байгаа 500 орчим жирэмсэн болон төрсөн эхчүүд байгаа бөгөөд тэдэнд төрөхийн өмнөх болон бусад нөхөн үржихүйн эрүүл мэндийн үйлчилгээ хүргэхэд нь сумын эрүүл мэндийн төвүүдэд дэмжлэг үзүүлэх юм байна.“Аливаа онцгой байдлын үед хүүхэд, эмэгтэйчүүд хамгийн эмзэг байдаг. Ялангуяа хоол, хүнсний нэр төрөл цөөрсний улмаас бие махбодын хэвийн үйл ажиллагаанд нэн шаардлагатай аминдэм, эрдэс бодисын дутагдлын эрсдэл улам даамжирдаг.  Цаг уурын хэт хүйтрэл нь хүүхэд амьсгалын замын цочмог халдвар, уушгины хатгалгаа болон бусад халдварт өвчин (улаан бурхан, салхин цэцэг) тусах нь нэмэгддэг.

Хоол тэжээлийн дуталтай хүүхдийн дархлаа сул байдаг тул өвчлөх, эндэх эрсдэл нь илүү өндөр. Тиймээс бидний хүргүүлж байгаа олон найрлагат бичил тэжээлийн бэлдмэл нь хаваржилт хүнд байгаа нутгийн хүүхэд, эхчүүдийн дундах өвчлөл, цаашлаад эндэгдлийг бууруулахад онцгой чухал юм” гэж НҮБ-ын Хүүхдийн сангийн Суурин төлөөлөгч Роберто Бэнес хэлэв.“Эмэгтэйчүүд бол Монголын нийгмийн нэг тулгуур багана. Тиймээс зудын үеэр эмэгтэйчүүдийнхээ аюулгүй байдал, онцлог хэрэгцээг хангах нь нэн чухал. Монгол Улсын Засгийн газартай хамтран зуданд өртсөн охид, эмэгтэйчүүдэд ариун цэвэр, эрүүл ахуйн багцыг хүргэж байгаа нийт малчдын эрүүл мэндийг дээшлүүлэхэд тустай” гэж НҮБ-ын Хүн амын сангийн Суурин төлөөлөгч Наоми Китахара онцлов.

"Монгол Улсын Засгийн газраас зуданд өртсөн аймаг, сумдад дэд бүтэц, нийгмийн үйлчилгээний хүртээмжийг сайжруулах арга хэмжээнд анхаарч ажиллаж байгаа. НҮБ-аас энэ ажил дээр нь дэм болгож, зуданд өртсөн 4390 малчин өрхийн нэн тэргүүний хэрэгцээг нь хангах, амьжиргаанд нь туслах зорилгоор хүмүүнлэгийн тусламж үзүүлж байна” гэж Монгол дахь НҮБ-ын Суурин зохицуулагч Биата Транкман онцлон тэмдэглэжээ.

Д.ЦЭЭНЭ