БНХАУ-ын Чянь Ань хотноо “Рио-2016” олимпийн наадмын эрх олгох Ази, Номхон далайн орнуудын боксын тэмцээн үргэлжлэн явагдаж байна. Өчигдөр эмэгтэй 75 кг-д Э.Эрдэнэтуяа Казахстаны Дарига Шакимоватай хүрэл медалийн төлөө тулалдсан ч 3:0-оор хожигдон тэмцээнээ өндөрлүүллээ. Түүний хувьд манай бүсгүйчүүдээс сүүлийн найдвар байсан юм. Учир нь 51 кг-д М.Нандинцэцэг эхний тойрогт, О.Сувд-Эрдэнэ хоёрдугаар тойрогт ялагдсанаар тэмцээнээ дуусгааад байсан. Ийнхүү олимпийн эрхийн төлөө урд хөршийг зорьсон эмэгтэй боксчид зорилгоо биелүүлж чадсангүй. Одоо тэдэнд ганцхан боломж үлдлээ. Энэ бол ирэх тавдугаар сард Казахстан улсад болох ДАШТ-д медальт байрт шалгарч байж, олимпийн эрх авах юм.

Ч.БОЛОР