Монголд их, дээд сургууль байгуулмаар юм байна. Энэ нь мэ­дээж хөрөнгө мөнгө шаард­сан том ажил л даа. Гэхдээ нэг байгуулчих юм бол жилийн дотор л ашгаа нөхөх боломжтой юм шиг санагдаад байгаа юм. Одоо байгаа их, дээд сургуулийг хар л даа. Хөдөө, хотын хэдэн хүүхдийг сайхан хошгируулаад л элсүүлээд авчихаж байна. Тэгээд дөрвөн жил сургаад л төгсгөчихнө. Амархан л бизнес байгаа юм даа. Хамгийн гол ажиллах улирал бол хавар. Энэ үед дунд сургууль төгсөж байгаа хүүхдүүдийг сургуульдаа элсч орохыг уриалж сурталчлаад хэдэн мянган хүүхдийг бүртгээд авчихна. Хүүхдүүд ч бүрт­гэлд хамрагдахын тулд нэлээд хэд хоног дугаарлан зогсож байж бүртгүүлнэ. Тэ­д бүртгүүлэхдээ мөнгө өгнө шүү дээ. Сургуулиуд дунджаар 5000-8000 төгрөг авдаг юм билээ. Нэг сургууль гэхэд таван мянган хүүхэд бүртгэж авчихаад 200 хүүхэд элсүүлж авдаг. Зөвхөн бүрт­гэлийн мөнгөнөөс л гэхэд 25-40 сая төгрөг олж байгаа юм. Ингээд сургуульдаа элсүүл­чихээд шууд л мөнгө “саах” ажилдаа орж эхэлнэ дээ. Хууль цаазын нэртэй нэгэн сургуулийн турш­лагаас харвал хүүхдээ элсүүлээд төл­бөрөө шууд авдаг юм билээ. Энэ бол үнэхээр зөв санаа. Төлбөрийг нь авчихсан байхад тэд хаачив гэж. Төлбөрийг нь урьдчилж авчихаад намар болохыг хүлээж голын эрэг бараадаад хорхог, боодог эр­гүүлнэ дээ. Ингээд намар болохоор нөгөө хэдэн хүүхдүүд чинь хүрээд ирнэ. Есдүгээр сард “Танилцах үдэшлэг” нэр­тэй эхнэр, нөхөр болгох шоу зохиогоод, өвөл болохоор шинэ жилийн арга хэмжээг гайгүй сайн баартай хамтарч зохионо. За тэгээд хавар “Төг­сөлтийн баяр“ хийчихнэ. Энэ нэг их сүрхий арга хэмжээ болохгүй ээ. Хэдэн оюутныг Монголын оюутны холбооноос “Ман­лайлагч оюутан” гэсэн ме­далиар шагнаад л гүйцээ. Оюутнууд өөрсдөө идэж уух, наргиж цэнгэх мөнгөө өг­чихнө. Бас болоогүй ээ дарга, захирлуудынхаа хоол идэх, архи уух мөнгийг ч даачихна. Ингээд л боллоо. Багшлах боловсон хүчний асуудалд санаа зовох хэрэггүй л болов уу. Учир нь хаана л бол хаана багш байна шүү дээ. Монгол хэлний багш ажилд аваад компьютерийн хичээл заалгачихна. Англи хэлний багшаар биеийн тамирын хичээл оруулчихна. Шинэ санааг минь дэмжих, хамтрах хүн байвал хандаарай.