–Боксын насанд хүрэгчдийн улсын аварга шалгаруулах тэмцээн  1 дүгээр сарын 11-17-ны өдрүүдэд Спортын төв ордны "А" зааланд болно–

Боксын насанд хүрэгчдийн Улсын аварга шалгаруулах тэмцээний нээлт өнөөдөр 14.00 цагаас Спортын төв ордны "А" зааланд болно. 2016 оны УАШТ-д 28 байгууллага, клубын ширэн бээлийтнүүд оролцохоор болжээ. Мөн эмэгтэйчүүдийн хоёр жинд ОХУ-ын Буриад, БНХАУ-ын Өвөр монголоос тамирчид оролцох юм байна.

Энэ сарын 17-ны өдрийг хүртэл үргэлжлэн явагдах УАШТ эрэгтэйчүүдийн 10, эмэгтэйчүүдийн 8 жинд болох юм. Олимпийн жилийн тэмцээн учраас түрүүлсэн тамирчин эрх олгох тэмцээнд оролцох учиртай. Тиймээс жин тус бүр өрсөлдөөнтэй өрнөх нь дамжиггүй. Шинэ оны өмнөхөн Улаанбаатар хотноо Монгол туургатны тэмцээн болсон. Энэхүү тэмцээн улсын аваргын өмнө болсноороо том сорилго болсон билээ. Тус тэмцээнээс харвал хашир тамирчин Б.Батхүү, Азийн аварга Д.Отгондалай нарын хооронд ширүүн тулаан болох болов уу. Мөн 56 кг-д Э.Идэрхүү, Б.Цэндбаатар, 69 кг-д ОУХМ З.Энхзориг гээд хүчтэнүүд даагаа нэхэх бол Гавьяат тамирчин У.Мөнх-Эрдэнэ 64 кг-д өрсөлдөх юм.

Ийнхүү үзүүштэй, сонирхолтой болох боксын насанд хүрэгчдийн улсын аварга шалгаруулах тэмцээн энэ сарын 11-17-ны өдрүүдэд Спортын төв ордны "А" зааланд болно.

Ч.БОЛОР