Хууль зүй, дотоод хэргийн дэд сайд В.Удвал: ЦЭЦИЙН ШИЙДВЭРИЙГ УИХ ХЭЛЭЛЦЭНЭ

-Үнд­сэн хуулийн Цэ­цийн шийдвэр нэгэнт гар­сан хойно УИХ хэлэлцэх ёс­­той. УИХ ямар шийдвэр гар­­га­хаас шалт­гаалж,  цэцийн их сууд­лын хурал хийх байх л даа. Энэ про­цессийг ир­­гэн хүний хувьд харахад хуу­лийн аливаа процессийг үл анзаардаг, тоомсорлохгүй байх нь сөрөг үр дагавартайг харуулж байгаа юм. Ер улс төрийн намууд үйл ажиллагаа явуулахдаа хууль эрх зүйн үндэслэл байна уу, үгүй юү гэдгийг судалж байж аливаа шийдэлд хүрэх хэрэгтэйг харууллаа.

Хуульч Л.Батцэнд: ХУУЛЬ ХЭРЭГЖИЖ БАЙГААД БАЯРТАЙ БАЙНА

-“МАХН гэдэг нэрийн хууль ёсны өмч­­лөгч нь Мон­гол Ардын нам юм” гэ­сэн Үндсэн хуу­лийн Цэцийн шийдвэрийг Монгол Улсын иргэн хүний хувьд хүндэтгэж байна. Үндсэн хуулийн Цэц бол мэргэшсэн байгууллага. Мэдээж хуулийнхаа зүйл, заалтын хүрээнд судалгаа шинжилгээний үндсэн дээр тодорхой шийдвэр гаргасан гэж үзэж байгаа. Монголд хууль нь хэрэгждэг. Хүмүүс нь хуулиа биелүүлдэг. Улс төрийн үйл ажиллагаа явуулдаг намууд нь ч бие биеийнхээ эрх ашиг, тэр дундаа жирийн иргэдийнхээ эрх ашгийг хүндэтгэн үздэг байгаасай гэж бодох юм. Цэцийн энэ удаагийн шийдвэр иргэдийн дунд бий болоод байсан мэдээллийн төөрөгдлийг арилгалаа.

УИХ-ын гишүүн Д.Одбаяр: ЗӨВ ШИЙДВЭР ГАРГАЛАА

-Мэдээл­лийг сониноос авлаа. Улс тө­рийн намуудын тухай хуулийн зарим  зүйл, заалт Үндсэн хууль зөрчөө­гүй гэсэн шийдвэрийг цэц гаргасан. Энэ бол зөв шийдвэр. Яа­гаад  гэ­вэл, Үнд­сэн хуу­лийн Цэцийн өмнөх хуралдаанаар энэ асуудлыг хэлэлцэхдээ хэрэглэхгүй байх хугацааны хувьд арай урт байгаа юм биш үү гэсэн үндэслэл гаргасан байдаг. Энэ үндэслэлийн хүрээнд шийдсэн дүгнэлт гарлаа.

Гавьяат хуульч И.Дашням: ЦЭЦ ШУДАРГА ШИЙД ГАРГАЛАА

Үндсэн хуулийн Цэцийн дунд суудлын хуралдаанаар Улс тө­рийн намуудын тухай хуулийн заалтын та­лаар хэлэлцсэн. Энэ талаарх мэдээллийг сонир­хон сонсч, Цэцийн шийд­вэр хэрхэн гарахыг хүлээж байлаа. Монгол Ардын намын өмчлөлд хуулийн дагуу МАХН гэдэг товчлол үлдлээ. Энэ бол хуулийн дагуу гарах ёс­той байсан шийдвэр. Хуулийг гуйвуулдаг, санас­наараа засдаг, танадаг эрхтэн дархтанууд ихтэй болсон болохоор эцсийн шийд яаж гарах бол гэж бодож байсан. Хуулийн дагуу шийдвэр гаргаж, МАН МАХН-ын түр штабынхны маргааныг нэг талд  гаргаж өгсөн нь жирийн иргэд бидэнд ч нэг чигийн мэдээлэл авах, олон намын дунд төөрөгдөхгүй байх нөхцөлийг бүрдүүлж өглөө. Н.Энхбаяр даргын хувьд Монгол Улсын Ерөнхийлөгч байсан хүн. Улс төрд дахин шинэ нам байгуулан улс төрийн эрчтэй үйл ажиллагаа явуулах эрх нь нээлттэй үлдлээ. Энэ эрхээ эдэлж улс төрийн идэвхтэй үйл ажиллагаа явуулаасай гэж хүсч байна.