БНХАУ-д албан ёсны айлчлал хийж байгаа Монгол Улсын Ерөнхий сайд С.Батболдыг өнөөдөр 17.00 цагт БНХАУ-ын Төрийн зөвлөлийн ерөнхий сайд Вэнь Зябао хүндэтгэн хүлээн авлаа. Албан ёсны угтах ёслолын дараа хоёр улсын ерөнхий сайд нар албан ёсны хэлэлцээр хийлээ. Энэ удаагийн айлчлалаар хоёр улсын харилцааг шинэ төвшинд гаргах болон эдийн засаг, хамтын ажиллагаа хүмүүнлэг, соёл боловсролын чиглэлээр нэлээд хэд хэдэн чухал баримт бичигт гарын үсэг зурна гэж байсан. Энэ удаагийн айлчлалын хамгийн гол үйл явдал нь хэлэлцээрийн дараа хоёр улсын харилцааг шинэ төвшинд гаргаж буйгаа хоёр тал албан ёсоор зарлаж, хамтын ажиллагааны хэд хэдэн гэрээ хэлэлцээрт гарын үсэг зуран баталгаажууллаа. Өмнө хоёр улс бие биенээ хүндэтгэсэн найрсаг харилцаатай байсан бол энэ удаад хамтын ажиллагааг нэг шатаар ахиулж стратегийн түншлэлийн харилцаанд шилжиж буйгаа зарлалаа.

Харилцан ашигтай бие биеэ нөхсөн стратегийн түншлэлийн харилцаанд шилжсэнээр эдийн засгийн харилцаа шинэ төвшинд гарч байна гэж албаны хүмүүс онцолж байна. Мөн энэ айлчлалын үеэр БНХАУ-аас манай улсад 60 сая юанийн буцалтгүй тусламж, 500 сая юанийн хөнгөлттэй зээл олгохоор болсноо зарлалаа. Монгол Улс тус улстай ялтан солилцох гэрээ байгуулахаар нэлээд хэдэн жил чармайж байгаа. Энэ гэрээг талууд энэхүү хэлэлцээрээр үзэглэсэн нь бас нэг дэвшил болсон юм.

Буцалтгүй тусламжийг Монгол Улсын иргэдэд нийтлэг хүртээмжтэй, үр дүнтэй төслүүдэд зориулах, хөнгөлөлттэй зээлийг эрчим хүчний дэд бүтэц бий болгох, боловсрол хөдөө аж ахуйн бусад салбаруудад ашиглахаар төлөвлөж байгаагаа ч манай тал илэрхийлсэн. Ялангуяа өмнө нь хөнгөлөлттэй зээлийг БНХАУ-ын компаниуд түлхүү ашиглаж байсан бол энэ удаагийнхыг хамтарсан болон Монголын компаниуд ашиглах, тухайлбал Монголын компаниуд гүйцэтгэгчээр оролцох боломжтой гэж Ерөнхий сайдын гадаад бодлогын зөвлөх О.Оч гарын үсэг зурах ёслолын дараа сэтгүүлчдэд товч мэдээлэл хийхдээ онцолж байлаа. Гарын үсэг зурах ёслолын дараа Хятадын тал Монгол Улсын Ерөнхий сайдыг хүндэтгэн зоог барив. Айлчлал маргааш үргэлжилнэ.