Хэдийгээр эдгээр нэр нь хоорондоо холбоогүй ч, тэд АНУ-ын Сан Франциско хотод байрладаг, мөн өнөөгийн Америкийг илтгэх нэрс гэдгээрээ ижил юм. Монгол Улсын Ерөнхийлөгч Цахиагийн Элбэгдорж АНУ-д хийж буй айлчлалынхаа хүрээнд “Hoover” хүрээлэнд зочилж, “Google ” корпорацид саатлаа.

Эхлээд Стэнфордын Их Сургуулийн харьяа “Hoover” хүрээлэнд зочилсон. Энд Ерөнхийлөгчийг АНУ-ын нэгэн нэр хүндтэй эрхэм хүлээж байв. Тэр бол АНУ-ын Төрийн нарийн бичгийн дарга асан Ж.Шульц юм. Улстөрийн асар их туршлагатай, нэр хүндтэй улстөрч Ж.Шульц бол монгол америкийн харилцаа хамтын ажиллагаанд үнэтэй хувь нэмэр оруулсан нэгэн билээ.

Ерөнхийлөгч Ц.Элбэгдорж, ноён Ж.Шульц нар хоёр орны найрамдал хамтын ажиллагааны тухай мөн дэлхий дахинд болж буй үйл явдлуудын талаар ярилцлаа.

Ерөнхийлөгчийн зарлигаар ноён Ж.Шульцийг хоёр орны найрамдал хамтын ажиллагааг хөгжүүлэхэд оруулсан хувь нэмрий нь үнэлж  “Алтан гадас” одонгоор шагнасныг уулзалтын төгсгөлд гардуулсан юм.
Энэхүү уулзалтын дараа Монгол Улсын Ерөнхийлөгч  алдарт “Google”-д хүрэлцэн ирэв.

Стэнфордын Их Сургуулийн  оюутан найзуудын үүсгэн байгуулсан “Google” анхны зорилго болох дэлхийн мэдээг олон түмэнд хүртээмжтэй хүргэх зорилтоо амжилттай хэрэгжүүлж байна. Өнөөдөр АНУ-ын нийт хэрэглэгчдийн 72% нь “Google” хэрэглэж, харин дэлхийн сая сая хэрэглэгчид 144 хэлээр хэрэгтэй мэдээллээ авч, бараг өдөр бүр “Google-хайлт, “You tube” “Gmail ” хэрэглэгчдийн тоо нэмэгдэж байна. Google-ийн дэлхий даяар тархсан салбаруудад 24 мянган хүн ажиллаж байна.

Өнөөдөр “Google” гэсэн нэгэн өвөрмөц  хэрэглээ, соёл бий болсон гэж хэлэхэд буруудахгүй. Шинийг эрж хайж, нэвтрүүлж интернэт хэрэглээг улам бүр амар хялбар бас “амттай” болгохын тулд бид ажиллаж байна” гэж “Google”-ийн бодлогын зөвлөх доктор Патрик Райан хэллээ.

“Google”-ийн хамт олон Монгол Улсын Ерөнхийлөгчид хамгийн шинэ “бүтээгдэхүүн”-ээ танилцуулав. Гар утсан дээрээсээ очих чиглэлийн замынхаа зургийг харж, хаагуур явбал саадгүй хүрэхээ  хялбархан заалгаж, чиглүүлэх программ “Google”-ийн хэрэглэгчдийн таашаалд нийцэж байна. Мөн яриаг өөр хэл рүү шууд орчуулах программ эрэлт хэрэгцээтэй байна” хэмээн тус корпорацийн нийтийн санаа бодлыг тандах албаны захирал Жонн Коллинс ярив.

Шууд орчуулгын программд монгол хэлийг суулгах талаар уулзалтад оролцсон монголын талын төлөөлөгчид санал хэлэхэд, “Google”-ын удирдлага энэхүү саналыг тааламжтай хүлээн авч, хэрэгцээг судлах ажлын хэсэг гаргахаар болов.
Энэ уулзалтын үеэр Монгол Улсын мэдээлэл харилцаа холбооны салбар  “Google” корпорацитай хамтран ажиллах талаар  хэд хэдэн тодорхой саналуудыг монголын талаас тавилаа. Тухайлбал, Улаанбаатарт “Google” -ын дата сентер байгуулах, Ази Европыг холбосон интернэт урсгалыг монголоор дамжуулах боломжуудыг судалж үзэхийг хүсэв. Далай дагасан интернэт урсгал өндөр зардалтай байдаг. Харин энэ урсгалыг монголоор дамжуулбал өртөг багатай байх болно.

“15 жилийн өмнө манай улсад анх үүрэн телефон нэвтэрч эхэлж байхад энэ үйл ажиллагааг эрхлэгчид монголд өнөөдрийнх шиг амжилттай ажиллана гэдгээ төсөөлөөгүй байх.  Харин өнөөдөр манай улсад 2.5 сая гар утас ашиглагдаж  байна. Энэ бол нэг хүнд ноогдох гар утасны тоогоороо дэлхийд дээгүүрт орох үзүүлэлт. Тэгэхээр “Google”  Монгол Улстай  хамтран ажилласнаар дэлхийн бусад оронд “Google”-ын хэрэглээ хэрхэн хурдан өсөн нэмэгдэж байгааг харуулах сайхан жишээ болно гэдэгт итгэлтэй байна. Монгол Улс мэдээллийн технологиороо Азид 11-т ордог, ойрын 3 жилдээ Азид 5-т ордог болох зорилт тавьж байгаа” гэж Ерөнхийлөгч хэлэв.

Уулзалтад мөн УИХ-ын гишүүн Ч.Сайханбилэг, Мэдээлэл харилцаа холбоо технологийн газрын дэд дарга А.Мөнхбат нар оролцож, монгол дахь интернэт хэрэглээний тухай мэдээлэл өгч, хамтран ажиллах боломжуудын талаар тодорхой асуудлууд ярилаа.