АНУ-д албан ёсны айлчлал хийж буй Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар 2011 оны 6 дугаар сар 15-ны өдөр Вашингтон хотод хүрэлцэн ирлээ. Зочид эхлээд Арлингтон дахь Дайчдын хөшөөнд цэцэг өргөв. Монгол Улсын Ерөнхийлөгчийн цуваа Дайчдын хөшөөнд ойртоход их буугаар 21 удаа буудаж хүндэтгэл үзүүллээ. Ерөнхийлөгчийг буухад Монгол Улсын Төрийн далбааг хүндэтгэлтэйгээр залж, Монгол Улсын Төрийн дуулал, АНУ-ын Төрийн дуулал эгшиглэв.

Уламжлал ёсоор нэр нь үл мэдэгдэх дайчдын хөшөөнд цэцэг өргөсний дараа дайнд амь үрэгдсэн дайчдыг хүндэтгэн бүрээн дуу эгшиглэж, бөмбөр дэлдэв.

Арлингтон дахь Дайчдын хөшөө нь 1921 онд АНУ-ын Конгресс , дэлхийн нэгдүгээр дайнд амь үрэгдсэн нэр нь тодроогүй цэрэг эрсийг Дурсгалын хөшөөний өмнө оршуулахыг зөвшөөрснөөр бий болсон бөгөөд, өнөөг хүртэл албан ёсны нэр өгөөгүй иржээ.

Зөвхөн дэлхийн нэгдүгээр дайн төдийгүй, хоёрдугаар дайн, Солонгос, Вьетнамын дайн, сүүлийн жилүүдэд Ирак, Афганистанд амь үрэгдсэн цэргүүдийг оршуулж, тэдгээрийн гэгээн дурсгалыг мөнхжүүлж иржээ. Бунханг АНУ-ын тэнгисийн болон хуурай явган цэргийн тусгай бэлтгэгдсэн цэргүүд 24 цагийн турш хамгаалалтандаа байлгадаг. Нийтдээ 300 гаруй мянган цэрэг дайчдын булш байдаг гэсэн тоо байдаг юм байна.