Хятад улсын статистикийн газраас гаргасан дүн мэдээгээр өнгөрөгч тавдугаар сард  тус улсын эдийн засаг дахь инфляцийн хэмжээ сүүлийн гурван жил гаруйн хугацаан дахь хамгийн өндөр төвшинд хүрсэн байна. Энэ нь тус улсад өргөн хэрэглдээний барааны үнэ өссөөр байгаатай холбоотой ажээ. Мөн өнгөрсөн оны мөн үеийнхтэй харьцуулахад Хятадын өргөн хэрэглээний барааны үнэ 5.5 хувиар өссөн байна.

Тэр дундаа хүнсний бүтээгдэхүүний үнэ тус улсад 11.7 хувиар өссөн нь инфляци тус улсад оргил хэмжээндээ хүрэхэд гол нөлөө үзүүлсэн гэж мэргэжилтнүүд үзэж байгаа юм. Хятадын хүнсний болон түүхий эдийн үнэ өссөөр байгаа нь тус улсын иргэдийн амьдралын өртгийг улам ч нэмэгдүүлж, дургүйцэл бухимдал төрүүлэх болсон тул төр засаг нь ч түгшиж эхэлсэн бололтой.

Шинжээчид инфляцийн өсөлт цаашдаа ч үргэлжлэх болно гэж дүгнэцгээж байгаа аж. Хятадын Чайна Мершантс банкны шинжээч Сюй Бяо хэлэхдээ, “Хятадын инфляци энэ зургаадугаар сард зайлшгүй 6 хувьд хүрэхээр байдалтай боллоо” гэжээ. Харин Хятадын засгийн газар инфляцийг дөрвөн хувиас хэтрүүлэхгүй барихаар чармайж байсан аж.