Монгол Улс үр шилжүүлэн суулгах мэс ажилбар хийдэг хоёр ч эмнэлэгтэй болжээ. Одоогийн байдлаар “Улаанбаатар Сонгдо” эмнэлэгт 300 эмэгтэй үр суулгуулахаар хандсан байгаагаас 40-д нь амжилттай үр суулгаж, бүсгүйчүүд өдгөө үрийн зулай үнэрлэхээ хүлээж суугаа гэнэ. “Улаанбаатар Сонгдо” эмнэлгийн хувьд өнгөрсөн гуравдугаар сараас эхлэн үр тогтоох мэс ажлыг хийж байгаа юм. Үүнийг Өмнөд Солонгосын эмч Чой  хариуцаж байгаа бөгөөд үр шилжүүлэн суулгах хүсэлтэй олон эхчүүд  өнөөдөр “Сонгдо”-д ханддаг болжээ.

БНСУ-ын 100 хувийн хөрөнгө оруулалттай “Улаанбаатар Сонгдо” эмнэлэг манайд үйл ажиллагаа явуулаад дөрвөн жил шахам болж байна. Тус улсаас нарийн мэргэжлийн эмч нар ирж ажилладаг, шинжилгээний сорьцыг БНСУ руу илгээж, хариуг нь баталгаажуулдаг гээд олон давуу талтай учир эдний үйлчлүүлэгчид олон.

Тэр тусмаа энэ өдрүүдэд дэлхийд алдартай “Mayо” клиникийн эмч нар “Сонгдо” эмнэлэгт ажиллаж, дурангийн хагалгаа хийж байгаа нь олны хөлд бүр ч илүүтэй дарагдахад хүрчээ. Дурангийн хагалгааг “Mayо” клиникийн  эмч  Марк, Жонн Дэвид нар өөрсдөө гардан хийж байна. Тэд өдөрт 30-40 өвчтөн үзэж, 3-4 хагалгаа хийж байгаа юм.