Монгол Улсын Ерөнхийлөгчийн дэргэдэх Иргэний танхимд “УИХ-ын сонгуулийн тухай хууль-жендэрийн тэгш эрх” сэдэвт хэлэлцүүлэг болж байна. УИХ-аар Сонгуулийн хуулийн төслийг хэлэлцэж байгаа энэ үед жендэрийн тэгш байдлыг хангах, шийдвэр гаргах төвшинд эмэгтэйчүүдийн төлөөллийг нэмэгдүүлэх, Мянганы хөгжлийн зорилтуудыг хангах чиглэлээр санал бодлоо хэлэлцэхээр уг арга хэмжээг зохион байгуулж байна. УИХ-аар энэ оны хоёрдугаар сарын 2-нд Жендэрийн тэгш байдлыг хангах тухай хууль баталсан ч улс төрийн шийдвэр гаргах төвшинд эмэгтэйчүүдэд квот тогтоох асуудлыг хуульчлалгүй үлдээсэн юм.

Хэлэлцүүлэгт улс төрийн намуудын дэргэдэх эмэгтэйчүүдийн байгууллагын төлөөлөл, эмэгтэйчүүдийн төрийн бус байгууллагынхан оролцож байна. Хэлэлцүүлгээс зөвлөмж гаргах бөгөөд түүнд Сонгуулийн тухай хуульд санал оруулах талаар тусгахаар боллоо. УИХ-ын Сонгуулийн тухай хуульд “Нам, эвслээс нэр дэвшигчдийн 30-аас доошгүй хувь нь нэг жендэрийг төлөөлсөн байх” гэсэн заалт оруулах, мөн хуулийн төслийн 39.1-д заасан сонгуулийн бэлтгэлийн дансанд “нам, эвсэл, нэр дэвшигчдийн өөрийн хөрөнгө, дэмжигч байгууллага, иргэдээс төвлөрүүлсэн болон сонгуулийн явцад оруулсан хандивыг төвлөрүүлж, мөн дансаар дамжуулан зориулалтаар нь зарцуулна” гэж оруулахыг санал болгохыг хэлэлцүүлэгт оролцогчид дэмжлээ.