САЙЖРУУЛААД Ч НЭМЭРГҮЙ
Хөрөнгийн зах зээлийг хөгжүүлэхийн тулд эн тэргүүнд авч хэлэлцэх асуудал бол Хөрөнгийн биржид бүртгэлтэй компаниудын засаглалыг сайжруулах явдал. Хэрвээ Монголын Хөрөнгийн биржийн технологи, дэд бүтцийг хөгжүүллээ гэхэд тэнд буй 134 компани нь идэвхгүй, засаглал муутайгаас болж хувьцаа эзэмшигчдээ хохироосоор байвал үр дүнгүй хоцорно. Компанийн засаглал муугаас сүүлийн жилүүдэд санхүүгийн салбарт багагүй хямрал учирсныг хүн бүр мэднэ. Тухайлбал, Анод банк хувьцаа гаргачихаад дампуурсан. Энэ бол Монголын Хөрөнгийн биржийн шалгуур муугаас үүдэлтэй. Мөн өнөөг хүртэл олон компани нэг болон нэгдмэл ашиг сонирхолтой бүлэг этгээдүүдээр Төлөөлөн удирдах зөвлөлөө бүрдүүлж цөөн тооны хувьцаа эзэмшигчдийг хохироосоор байгаа. Үүнээс гадна төрийн өмчийн компани нэрийн дор албаар ашиггүй ажилладаг компани ч бий гэж ярих мэргэжилтнүүд байна. Үүнтэй холбогдуулан өчигдөр “Компанийн засаглал ба хөрөнгийн зах зээл” форумыг зохион байгууллаа. Форумд Хонконг, Шанхай, Лондоны хөрөнгийн биржийн төлөөлөгчид болон Монголын санхүүгийн салбарынхан оролцсон юм. Форумын үеэр Хонконгийн хөрөнгийн биржийн бүртгэлийн хэлтсийн захирал Катерин мэн, “Хөрөнгийн биржийн шалгуур компанийн засаглал хоёр нягт холбоотой. Хонконгийн биржийн хувьд компанийн ТУЗ-ын бүрэлдэхүүн, хараат бус гишүүдийн талаар эн тэргүүнд авч үздэг” хэмээсэн юм. Харин Санхүүгийн зохицуулах хорооны дарга Ц.Баярсайхан “Хөрөнгийн биржийн листингийг чанаржуулах асуудал нэлээд чухал байна. Юун түрүүнд Компанийн тухай хуультай болох хэрэгтэй” гэсэн юм
Корпорацийн засаглалыг хөгжүүлэх төвийн захирал Х.Батжаргал:
-Хөрөнгийн зах зээлийг хөгжүүлж, Монголын олон компани гадны хөрөнгийн биржүүдээс мөнгө татах эрин үе эхэлж байна. Ийм үед хөрөнгийн зах зээлтэй хөл нийлүүлж алхахын тулд компанийн засаглалаа маш сайн хөгжүүлэх ёстой. Өөрөөр хэлбэл оролцогч талууд болох хэрэглэгч, хөрөнгө оруулагч, Төлөөлөн удирдах зөвлөл, олон нийтийн эрх ашгийг хамгаалахуйц дүрэм, журмаар шийдвэрээ гаргаж, бодлогоо тодорхойлох ёстой гэсэн үг. Хөрөнгө оруулагчид ч ийм компанийг хайдаг цаг иржээ. Монголын тухайд компанийн засаглалын хөрс муу байна. Хөрөнгийн бирж энэ дагуу холбогдох шаардлагаа маш хатуу илэрхийлэх ёстой.
Санхүүгийн зохицуулах хорооны Үнэт цаасны газрын орлогч дарга С.Тулгаа:
-УИХ-аар батлах гээд хэлэлцүүлгийн шатандаа яваа Компанийн тухай хуульд бид нэлээд найдаж байна. Ингэснээр бид цаашдаа дэлхийн томоохон Хөрөнгийн биржүүдтэй нэг түвшний шалгуур үзүүлэлтийг компаниудад тавьж чадна. Ер нь бид 2000 оноос эхлэн энэ талаар ярьж эхэлсэн. Хөрөнгийн зах зээлээ хөгжүүлэхээр бэлдэж буй энэ үед яах аргагүй анхаарал татсан сэдэв болоод байна.
Эх сурвалж:
"Улс төрийн тойм" сонин