Энэ сар гарснаас хойш ОХУ-аас 193 вагон дизель түлш Монголын хилээр орж иржээ. Дизель түлшний  хомсдолтой холбоотойгоор зарим галт тэргийг аялалд гаргахгүй, хязгаарлаад байсан бол энэ сарын 3-наас галт тэрэгний хөдөлгөөний хязгаарлалтыг цуцалж, хэвийн байдалд орсон гэх албан ёсны мэдээллийг өнгөрсөн долоо хоногт өгч байв. Гэтэл өнөөдрөөс дахин хязгаарлалт хийх болжээ. Энэ талаар “Улаанбаатар Төмөр Зам” хувь нийлүүлсэн нийгэмлэгийн Тээвэр хариуцсан орлогч дарга Д.Жигжиднямаагаас тодрууллаа.

-Өнгөрсөн долоо хоногт дизель түлшний хангалт сэргэж галт тэрэгний хөдөлгөөнийг бүрэн сэргээсэн гэж мэдээлж байсан. Яагаад дахин хязгаарлалт хийх болов?

-“Улаанбаатар Төмөр зам” дизель түлшээр хомсдсон хэвээр байна. Өнөөдрийн байдлаар гуравхан хоногийн нөөцтэй байгаа. Тийм учраас буцаад хязгаарлалтын горимд шилжихээс өөр аргагүй байдал үүсээд байгаа юм.

-Хязгаарлалтын горимд шилжсэнээр галт тэрэгний хөдөлгөөнд өөрчлөлт орно гэж ойлгож болох уу?

-Хамгийн түрүүн зорчигчдын  галт тэрэг, хүнсний галт тэрэг гэх  байдлаар  хязгаарлалтыг хийнэ. Сүүлийн үед Замын-Үүдээс явж байгаа зорчигчдын урсгал их байгаа учир нэмэлт галт тэргийг явуулах шаардлага гарч байна. Харин  зорчигчдын урсгал бага Улаанбаатар-Зүүнхараагийн галт тэргийг түр хугацаагаар зогсоох шийдвэр гарсан.

-Тэгэхээр  хэзээ хязгаарлалтаа зогсоох нь  тодорхойгүй гэсэн үг үү? 

-Хязгаарлалт хэзээ дуусахыг сайн хэлж мэдэхгүй байна.Өнөөдрөөс Улаанбаатар-Зүүнхараагийн чиглэлийн 281, 282-р галт тэргийг зогсоох  шийдвэр гарсан. Бямба, ням гаригаас бусад ажлын өдрүүдэд Зүүнхараагийн чиглэлд галт тэрэг явахгүй. Сэлэнгийн чиглэлд  зөвхөн оройны галт тэрэг л явна.

-Өмнө нь тээврийн галт тэрэгт бас хязгаарлалт хийсэн гэсэн?

-Урьд нь энэ  сарын 3 хүртэл хязгаарлалт хийж, хэвийн горимд нь оруулсан ч дизель түлшний хангалт сайжрахгүй байгаа учраас дахин  хязгаарлалт хийхээс өөр аргагүй боллоо.

-ОХУ-аас 193 вагон дизель түлш орж ирсэн цаашид ч орж ирнэ гэдэг мэдээлэл байгаа энэ нь галт тэрэгний үйл ажиллагааг хэвийн явуулахад нөлөөлөх үү?

-Дизель түлж  орж ирлээ гээд төмөр замд хуваарилагдахгүй л байна шүү дээ.